茄汁蝦碌 + 腐乳唐生菜 ( 6-JUL-2017 )

( 6-JUL-2017  WED )

尋晚明明眼瞓   點知越諗越激氣   搞到瞓唔好   咁樣真係唔得喎 ~

我 7 點 45 分先起身   感恩又唔眼瞓   唔係大鑊咯 ~

好餓呀   早餐食米粉餐 ~



又要做長命 Report   不過今次要快手   因為好想 Load 相   哈哈 ~

8 卦病咗 2 日   佢好慶話西瓜前一晚話搭的士走   駛唔駛拎部電腦比佢 ?!   仲問佢今晚覆唔覆客 ?!   真係痴痴哋   人哋發燒感冒呀   所以我每月一到請假   我知佢好唔鍾意   但我真係番唔到工   如果唔係都唔會月月請啦   前世未比你話過咩 ~

Lunch Time 又食健康餐   阿齋都話我勁   可以連食兩日   我話真係好味道喎   呵呵 ~

仍然做長命 Report 呀   係咁 Check 呀 Check   所以好快就放工 ~

放工即去街市買餸   唔知係咪菇場真係凍得滯   行咗街市兩個圈都無汗出   但如果番完教會去買餸   真係買到出汗   哈哈 ~

家姐搞笑   6 點 15 分打嚟問我煮完未 ?!   我話大嫂   啱啱番到屋企咋   佢仲好驚訝咁問點解咁遲 ?!   我話要買餸呀   唔係點煮呀   哈哈 ~

搞掂哂就拖地   6 點 40 分即煮喇   好鬼餓 ~

是日晚餐 - 茄汁蝦碌 + 腐乳唐生菜

茄汁蝦碌 - 由尋晚開始已經超級勁想食呢個餸   今日直頭覺得成日聞到茄汁蝦碌味道添呀   所以非煮不可   今晚買一份嘅蝦 $35   其實我應該買半斤好過   不過話就話海蝦   但都有 2 隻款   價錢都唔一樣   咁應該係海蝦同草蝦分別   唔係兩樣都係海蝦 ~

腐乳唐生菜 - 又清咗樽腐乳   正呀   以前唔識煮嘢   唔知生菜有分唐生菜同西生菜   以為唐生菜就要淥好耐   但識煮少少嘢之後   依家鍾意買唐生菜喇   好似新鮮啲咁   因為西生菜多數係包住一個個   同埋好多都生哂"秀"咁   所以都好耐無買佢 lu ~

今餐真係好滿足喇   食完之後真係好開心   哈哈 ~

開心過後就要洗碗   沖埋涼就休息 lu ~

又同冰姑傾下偈   不過今晚都好攰   加上尋晚瞓得唔好   所以 10 點半即瞓 ~