黑椒牛扒 + 唐生菜 ( 12-MAR-2019 )

( 12-MAR-2019  TUE )

感恩一覺瞓天光   晚晚係咁就好喇   哈哈 ~

天氣終於無咁潮濕喇   但就仲係凍凍地咁呢 ~

早餐食吞拿魚治烘底   唔想食包但又食唔落米粉   呢下先慘   哈哈 ~

菇場忙呀   好在夠精神 ~

家姐嘅街坊教 Berry 要咁樣食嘢

Lunch Time 去食韭菜餃麵   食第 1 碗嘅時候   我食咗 1 啖麵 + 半隻餃子   覺得啲肉都有少少生   咁即整開埋其他 4 隻   其中 3 隻啲肉都係唔熟   所以同職員講   佢話淥個另一碗比我   我睇住佢掉落垃圾桶   不過佢都無可能翻煮啦   我隻隻整開哂 ~

第一碗嘅生豬肉     

到第 2 碗嘅時候   真係感覺到成碗嘢係滾熱辣   但我都整散啲餃子睇睇先囉   整到第 3 隻嘅時候   成隻餃子根本未熟   頂佢   我同職員話依碗直頭係生豬肉餃   點食呀 ?!   之後我話我走喇   佢點一點頭 ~

成隻未熟呀   真係完全接受唔到啦

之前呢間已經有 2 次係生嘅豬肉   但係食到最後嗰隻先知   咁我最多唔食   但今次離哂大譜囉   真係永遠唔會再去呢間食㗎喇 ~

無得食仲要已經 1 點 05 分   咁我買埋生果都 1 點 20 分喇   即買腸粉番菇場食囉 ~

食完又即開工   順便 Pack 埋 File   唔係又比人嘈   哈哈 ~

放工即走   番到屋企都預備晚餐 lu ~

里奧大人今晚搭快車   所以 7 點都番到屋企喇 ~

是日懶餐 - 黑椒牛扒 + 唐生菜

黑椒牛扒 - 尋晚喺青林買咗 4 塊黑椒牛扒   唔係好大塊   但都要 $46   不過都好過我自己整   因為我實整到好 "鞋"   但如果買現成呢啲   又唔會咁囉   呵呵 ~

唐生菜 - $8/2 個都抵   最緊要唔好太多   呢排真係唔鍾意食菜   好奇怪 ~

洗埋碗就抖陣   8 點同里奧大人出去徑步   徑半個鐘就去超市買 Flakes   之後番屋企 lu ~

沖埋涼就睇陣電視   今日好似無停過咁   所以 10 點 45 分都瞓覺喇 ~