黑椒牛肉炒銀針粉 + 蕃茄南瓜粟米薯仔湯 + 自家制餐包 & 芒果布甸 ( 11-AUG-2020 )

( 11-AUG-2020  TUE )

今朝 8 點 15 分都起身   沖埋涼就出發 ~

買埋外賣就番菇場慢慢嘆   依家覺得喺菇場食早餐都唔錯 ~

9 點 45 分即開工   忙到痴咗 ~

11 點 45 分又 Lunch Time   但唔餓   所以出去行陣先買 Lunch ~

       

食完即 Load 相   之後唔夠 1 點都開工喇 ~

做呀做   做到接近 5 點先放工呀   第一次開咁耐 OT   哈哈哈哈 ~

番到屋企即沖涼   之後又預備晚餐喇 ~

里奧大人 7 點左右番到屋企   等佢沖埋涼就開餐 ~

是日晚餐 - 黑椒牛肉炒銀針粉 + 蕃茄南瓜粟米薯仔湯 + 自家制餐包 & 芒果布甸

黑椒牛肉炒銀針粉 - 完全唔知點煮好   醒起冰格有肥牛   咁即解凍喇   依家好在買定好多急凍肉   想幾時食都得 ~

蕃茄南瓜粟米薯仔湯 - 上次幫家姐煲蕃茄湯   我都順便買埋 2 斤蕃茄   加咗幾粒男爵薯仔   估唔到擺咗喺雪柜個幾月都無壞   不過就真係食唔到薯仔味囉   哈哈 ~

自家制餐包 & 芒果布甸 - 里奧大人同事比架   餐包夾芝士真係好正   不過芒果布甸就食唔落   要留番聽晚食呢 ~

洗埋碗再大清潔廚房   搞掂哂就即開機洗衫   沖埋涼就休息喇 ~

里奧大人 11 點瞓   我就繼續睇 youtube   之後佢話知道我點解咁夜唔瞓   話聽日唔駛番工喎   哈哈 ~