香煎三文魚扒 + 茄汁螺絲粉 + 粟米蛋花湯 ( 13-OCT-2020 )

( 13-OCT-2020  TUE )

今朝里奧大人 7 點起身即開電視睇風暴消息   之後同我講話今日應該唔駛番工   咁我哋都繼續瞓多陣喇 ~

瞓到 10 點15 分起身   又即開電視   睇到 "日間大部份時間會維持 8 號烈風信號"   咁肯定今日唔駛番工 lu ~

梳洗完就蒸鯊魚燒賣   家姐真係比得我及時呀   哈哈 ~

食完都 11 點   又執下嘢   一望個鐘又已經 1 點   沖埋涼就焗朱古力曲奇 ~

實在好想清包朱古力粒   即上網睇食譜   有個食譜係唔用牛油同麵粉   咁即刻試啦   但材料唔夠   我就減份量 ~

搓埋得咁少   不過仲好   唔好食都唔駛驚   哈哈

焗出來咁鬼樣   糟糟仲話似澳洲一座名山   擺明玩嘢   哈哈   但食落塊邊係脆   同埋有煙韌口感   但中間就麻麻哋   所以都係掉咗算喇

2 點要預備 Lunch   因為我驚里奧大人餓呀 ~

終於清哂包蔥阿伯豬肉水餃   但仲有 2 條韓式熱狗未清   里奧大人話唔鍾意食呀   唉

仍然睇 "反黑路人甲"   但 6 點唔夠都要預備晚餐喇   今晚要分開 3 次煮呀   得閒真係要睇煮食爐   好唔慣一個爐頭煮嘢呀   時間真係用咗 Double 咁 ~

是日晚餐 - 香煎三文魚扒 + 茄汁螺絲粉 + 粟米蛋花湯

香煎三文魚扒 - 又係家姐比嘅三文魚扒   今晚好有心機煎   估唔到里奧大人食埋魚皮   平時佢一定唔食   之後佢話啲皮脆卜卜好味呀   聽見佢咁講   我都好開心   哈哈 ~

茄汁螺絲粉 - 里奧大人鍾意茄汁   咁就整啦   順便清埋盒螺絲粉 ~

粟米蛋花湯 - 無諗過打得成風   所以無買定啲菜   好在屋企長期有粟米湯咋   不過依家唔會成日飲   因為好鬼貴呀   之前買過最平只係 $6.5/罐   疫情之後同一個牌字   最平係 $9.8/罐   仲成日無特價   所以唔捨得買 ~

洗完碗就大清潔廚房   我應該封咗壞嘅爐頭   咁我可以洗少 1 個爐頭   哈哈 ~

個樣好似想逃跑咁

第 1 次見佢收埋手仔   家姐話佢唔想剪指甲呀   真係超級醒   睇佢細個個樣   真係豬兜咁款   估唔到依家係古惑女 1 名   真係失敬失敬

沖埋涼就食生果   之後睇電視   今日雖然放假   但都做咗成日嘢呀 ~

放兩個膠盒喺冰格   感覺整齊啲咁   但其實係之前執櫃   剩番好多膠盒唔捨得掉呀   哈哈   依家買一個膠盒好鬼貴㗎

睇埋 "阿爺廚房" 同埋新聞   今晚又 11 點幾先瞓呢 ~