蝦餃 + 雞扎 + 鳳爪排骨飯 (外賣) ( 26-JAN-2022 )

( 26-JAN-2022  WED )

尋晚臨瞓前食咗個甜筒   又係半夜熱到流汗   上次食完綠茶雪糕又係咁   我諗住會凍點知反而流汗   我會再試多次先   哈哈 ~

早餐食奶醬多   仍然覺得好味   哈哈 ~

菇場忙呀   所以時間過得好快 ~

船頭話我今日做咩花木蘭咁   我話去大酒店呀 ~

Lunch Time 同小說小 A 一齊搭 Lift   小說又話我後生咗   咁我話要 Keep 住呢個髮型了   哈哈 ~

行咗一大個圈   再買紅腸酸辣米線番菇場慢慢食 ~

仍然唔忙啦   放工就去里奧大人公司   等埋佢一齊去大酒店 ~

6 點幾去到   諗住坐半個鐘就走   之後同兒生仔女傾偈   傾到 7 點幾先走 ~

同姑奶搭的士   順便兜埋佢番屋企   之後買晚餐番屋企食   我唔係咁餓   但里奧大人就好餓喇 ~

抖陣就沖涼   之後叫里奧大人一齊睇 ASTRO 日本訪問   我話喺公司睇咗一半覺得好笑   所以想一齊睇   哈哈 ~

成班顛仔好搞笑   里奧大人都笑到咔咔聲   睇完都 10 點半   之後又同阿花傾偈   傾到大家都想嘔   因為我哋傾見過最嘔心嘅嘢   佢話有次麵包店買嘢   佢聽到廚房有人好大聲打噴嚏   佢話唔敢望入去   但之後無再喺呢間麵包店買嘢   又話食話梅肉食到個頭頭 ~

我好細個嘅時候食干蒸牛肉   我咬開一半先嘅   奇怪點解會 "索" 一聲   原來我咬緊隻小強   自此之後好耐無食   同埋食點心要整開一半先放入口食   不過依家都無咁做喇   哈哈 ~

不過有樣嘢無變   就係我飲熱飲   永遠一定唔會飲到落底   凍飲就無問題   因為多數透明杯   會睇到有無啲咩   哈哈哈哈 ~

傾到 11 點半呀   我話好嘔心唔傾喇   同埋我都要瞓覺   佢知我好早瞓   所以 11 點半算好夜   哈哈 ~