菠蘿咕嚕斑腩 (外賣) + 蒜味香腸 + 菜心苗 ( 27-OCT-2022 )

里奧大人食剩大半碗白飯   例湯就留比我嘅

( 27-OCT-2022  THU )

感恩一覺瞓天光呀   瞓到 7 點 20 分自然醒   呢個時間起身最好   可以慢動作刷牙沖涼   哈哈 ~

吞拿魚包 & 餐蛋包

菇場冷氣又好凍   我要絲巾保暖條頸   船頭叫我買件背心   佢問老公買啡色定黑色好 ?!  佢話老公話佢着黑色好似隻大狗   笑死我呀   哈哈哈哈 ~

買完菜同香蕉就去買 Lunch 喇   今日又係食雞翼重慶酸辣紅薯粉   但今日一開個蓋   一陣 "紙" 味咁呀   其實係筍嘅味道   但真係好臭囉   始終喺公司咁大陣味真係唔好囉   搞到我要好快食完   唔好臭親人啦 ~

無啦啦又勁忙   好在 5 點鐘就搞掂哂 ~

放工即走   番到屋企都預備晚餐了 ~

是日懶餐 - 菠蘿咕嚕斑腩 (外賣) + 蒜味香腸 + 菜心苗

菠蘿咕嚕斑腩 (外賣) + 里奧大人午餐食剩㗎   佢話食咗 2 嚿魚   估唔到份量咁多   佢話根本係一個餸   唔係午餐呀 ~

蒜味香腸 - 我以為自己解凍咗豬肉   點知原來係雞翼   所以焗多幾條腸咁囉   咁等里奧大人有樣新餸食下   哈哈哈哈 ~

菜心苗 - 原來要 $14/斤   我仲以為 $10/斤添  不過啲菜都好甜同埋無渣   都會再買嘅 ~

煮多個拉麵比里奧大人聽日帶飯   之後洗埋碗就休息一下   8 點左右就同里奧大人去做運動 ~

今晚比較攰   所以做 20 分鐘運動算喇 ~

開埋機洗衫就去沖涼   睇完電視都 10 點半   之後即刻瞓覺呀   前排真係超級忙   又瞓得唔好   所以依家搞掂哂   真係要快快補眠呢 ~