今朝一覺瞓到 7 點半都醒醒哋 但繼續瞓到 9 點半先起身 沖埋涼就去食早餐喇 ~
餐肉+腸仔+煎焗流心蛋配輕盈火腿濃湯通粉+蒜香牛油多士 ($40) - 食咗隻蛋+通粉+沙律菜都夠哂飽 其他留番今晚食 lu
意式蕃茄濃湯火腿通粉配黑松露炒滑蛋+蒜香牛油多士 ($40) - 里奧大人首選蕃茄湯底嘅食物 咁確實係開胃啲嘅
里奧大人陪我去婦檢 我哋 11 點鬆啲出門口 本身約咗 12 點但遲咗 20 分鐘呀 ~
感恩去到等咗一陣就到我 醫生一見到我就話我越嚟越後生 之後又同里奧大人講咗幾次 我問醫生係咪認得我 ?! 佢話當然認得啦 妳啲嘢咁麻煩 哈哈 ~
入到房檢查 醫生又話點解我真係越嚟越後生咁嘅 加埋兩個酒粒仲後生添 我話可能剪咗頭髮同埋塊臉肥呀 佢話唔關事喎 ~
醫生成日叫我照顧好自己身體 咁就係錫身邊嘅人 我話我身體唔好累到老公要照顧我 醫生即刻話咁妳又無累到嘅 我話我都會做運動減肥㗎 佢即刻話啱喇 哈哈 ~
依家個瘤縮到 5cm 咋 真係非常之感恩 子宮同卵巢都無問題 不過身體有點兒狀況 所以醫生寫字叫我去醫院開 File ~
里奧大人就好擔心 我話唔駛擔心喎 難得醫生寫紙 有得 Keep 住去睇都好呀 ~
去埋化驗所抽血就去附近食午餐 今次要食韓餐 因為大部份都係韓國餐廳 哈哈 ~
開餐
火桶水冷麵 (升級 +$20) - 麵條好煙韌 所以里奧大人話啱哂我呀 最正係有蘋果 青瓜同蘿蔔絲 感覺好清爽呀 我食完碗麵 個人真係當堂好凍呀
大邱炭烤豬肉 ($68) - 里奧大人唔食辣 不過我試咗豬肉好味喎 有炭燒嘅味道
食完去新世界韓國食品買辣椒粉 如果唔係里奧大人帶我去 我就肯定唔識去囉 ~
買完就去裕華買八仙果 今日雖然好熱 不過食完都想行下 所以行去裕華喇 ~
同里奧大人睇背囊 佢終於都肯買啦 $829 仲有 9 折即係 $746.10 我話要送比佢做生日禮物 其實我想用哂信用卡啲錢 因為上次遲咗取消 所以銀行將年費當信用額用呀 快啲用哂唔駛心掛掛 ~
里奧大人問職員台灣節有無八仙果 ?! 佢話有呀 咁我哋買完先再嚟拎背囊喇 ~
感恩今次買到呀 因為做到今個月 22 號咋 ~
台灣柚子參 (八香果) ($78/包) - 依家喉嚨唔舒服先食 所以買住 2 包先
里奧大人去洗手間 所以叫我坐低等佢 好在無聽佢講咋 哈哈
拎埋背囊就搭巴士去醫院開 File 估唔到好快搞掂 之後我話想番屋企 里奧大人以為我仲想行街 仲諗住去探菜仔 不過我話有啲攰呀 哈哈 ~
執下廚房嘢又到 6 點 今晚要早啲食晚餐 因為要飲啲湯包 原來係 11 月到期呀 ~
膳府 Tujang 辣包肉醬 ($20) & CJ 辣椒醬 500g ($28)
粗身辣椒粉 ($18) & 幼身辣椒粉 ($18)
水姑之前喺鴻福堂嘅海底椰枇杷響螺鷓鴣湯 & 冬瓜薏米荷葉瑤柱無老鴨湯 & 椰子雪耳百合竹絲雞湯
青木瓜花生紅棗魚湯 & 瑤柱桂圓淮山栗子雞湯
是日晚餐 - 餐肉腸仔拚蒜香牛油多士 + 青木瓜花生紅棗魚湯 + 冬瓜薏米荷葉瑤柱無老鴨湯
餐肉腸仔拚蒜香牛油多士 - 今朝食剩㗎 本身諗住自己食埋去 再煮個雞肉丸丁麵比里奧大人 點知佢話唔係咁餓 咁就好喇 可以 Share 食 哈哈 ~
青木瓜花生紅棗魚湯 + 冬瓜薏米荷葉瑤柱無老鴨湯 - 我覺得有啲鹹 但飲完唔口渴嘅 ~
洗埋碗就開機洗衫 抖陣就熨 2 機衫 熨完啱啱好睇 "璀璨之城" ~
睇完再睇多陣 Youtube 今晚 10 點 40 分都瞓覺先喇 ~
沒有留言:
發佈留言