沙茶金菇肥牛煲 + 牛油栗米

尋晚特登早 3 個站落車   因為有間商場嘅 7 仔買雜誌係平 $ 1 同有紙巾送   點知去到雜誌未出呀   上次去都出咗   做咩今次未出架   搞到我無哂心機 

我成日都係咁   明明好想買嘅嘢   買唔到嘅話   會好唔開心架

諗住整臘腸排骨飯   去到吉之島見到 d 排骨唔多靚咁   唔買啦   又諗到自己都好攰   所以打比里奧大人話唔煮飯   出街食算喇 

但一路行又覺得好似好衰咁   難得早咗番到屋企   大把時間都唔煮   同埋我覺得里奧大人一唔食我煮嘅住家飯   塊面好似好青咁   面無血色勁暗啞好核突   所以後尾打番比里奧大人話都係煮飯喇   簡簡單單算喇

唉   當唔想煮飯嘅時候要煮嘅話   就一定要煮自己鍾意食嘅嘢喇

去街市買肥牛半磅 ($14) + 3 條粟米 ($5) + 2 包金菇 ($12)   我覺得金菇好似貴咗咁   之前好似係買 $ 7 / 2包架 

是日懶餐 -  沙茶金菇肥牛煲 + 牛油粟米
沙茶金菇肥牛煲 - 好味就好味   但勁油呀   真係只可以幾個月食 1 次呢 
牛油粟米 - 有時間   所以又用手逐粒拻消磨時間   不過依家粟米唔甜   唔係咁好食呢

今餐又肥牛又牛油   食完肯定肥爆磅呀

其實我真係好攰   但又唔願做運動   所以熨衫算喇   用陰力熨衫仲辛苦過做運動呀
 

  

      

今朝天氣唔錯   又係星期五喎   所特別醒神呀

無啦啦又想食芝士 所以又食芝腿菠蘿包 + 凍央 ($17)   用開心嘅心情食嘢真係零舍好味呀

今日晏晝又得我一個食 lunch   所以就去試下一間好多人食嘅米線舖頭   外賣腩肉 + 枝竹小鍋米線 (小辣) + 奶茶 ($32)   雖然唔係話好辣  但一路食一路流鼻涕啊