紅豆糭 + 梘水糭 + 眉豆糭 + 南瓜栗子紅蘿蔔豬展湯 ( 22-MAY-2011 )

( 22-MAY-2011  SUN )

今朝同里奧大人一齊 9 點起身   去太興食早餐   因為家姐之前幫我買咗 Cash Coupon   唔用就唔記得用㗎喇   我多數食完早餐就會拎錢出嚟找數   好少會去到 cashier 先拎錢   今次我真係好彩呀   因為我以為自己只係拻咗一張 $50 Coupon   點知我比完錢之後   行咗幾步   聽到 Cashier 叫小姐小姐   原來叫我呀   我比咗 2 張 $50 Coupon 呀   佢唔比番我   我都唔知自己比多咗㗎 ~

食完早餐番主日學   之後崇拜   話咁快就 1 點幾 lu ~

同里奧大人行陣商場   去埋超市   因為之前剩咗 3 條紅蘿蔔   咁唔好嘥嘛   煲埋佢   所以諗住煲南瓜湯   但啲南瓜細細件都 $8   我又想買埋粟米栗子   但喺百佳買應該會貴好多   所以最後都係唔買喇 ~

番到屋企又未餓   所以我就諗住去惠康買豬展番蹳煲湯包就算   去到見到南瓜又想買   一件細細 Pack 好咗嘅都要都要 $ 6   但咁少實唔夠啦   買兩件都要 $12   所以我索性買一個大嘅   都係 $19   再買多一包真空栗子   估唔到到頭來都係喺超市買南瓜栗子   不過我真係唔想行去街市囉 ~

3 點先食 Lunch   就係食番尋晚剩嘅嘢喇   好在有焗爐   唔駛開爐就最開心呢 ~

食完要預備煲湯  洗洗切切唔少時間㗎   之後再熨衫   里奧大人走埋嚟話幫我熨   叫我抖下   唔好講笑   我真係番到屋企無停過㗎   所以我真係抖下比佢熨喇 ~

是日懶餐 - 紅豆糭 + 梘水糭 + 眉豆糭 + 南瓜栗子紅蘿蔔豬展湯

紅豆糭 + 梘水糭+ 眉豆糭 - 媽咪買比我㗎   不過佢就將唔同嘅糭放埋一袋   好彩我揀咗 4 隻   有 3 隻係唔同味   唔係 4 隻一樣都幾慘 ~

南瓜栗子豬展湯 - 好耐無飲呢個湯   不過今次加多咗水   唔係仲好飲呢 ~

沖完涼睇電視   無啦啦個胃痛到呢   好似抖唔到氣咁   應該係胃酸倒流   里奧大人話食糭難消化   但我覺得唔係   因為之前食糭做早餐都無問題   我覺得可能係我飲完雞骨草再食雪條囉 ~