馬拉盞茄子豆腐 + 蔥花叉燒炒飯 ( 1-FEB-2012 )

( 1-FEB-2012  WED )

今朝諗住去自己食開間餐廳食早餐   點知見到老闆入去   咁我即轉場   食食下又見到同事   又一齊食喇 ~

番到菇場好忙呀   忙到 Lunch Time 囉 ~

晏晝有 Lunch Box   覺得好好味呀 ~ 

放工即買餸   真係超級憎去街市   但街市又夠集中   超市真係唔係樣樣有   所以我幾唔鍾意去都會去下囉   我買咗 $8.5  菜心   比 $100 佢找   佢話比散紙嘛   我話有就比你啦   講真   我好怕街市找啲錢   成日濕立立又殘   唔係無散紙我真係唔會比 $100 囉   之後買豆腐   問佢係咩   條友又串串共   我唔係費事周圍搵   我都唔會幫襯佢   我真係好唔鍾意逗留喺街市咁耐   我會覺得好烏糟同好掹囉 ~

買餐餸都要咁激氣   真係人都顛   所以明明記得去太興買叉燒   但最後番咗屋企要再落嚟買過 ~

番到屋企開機洗衫   之後就預備晚餐   切粒粒真係要好多時間   茄子又要蒸   咁蒸茄子段時間就用嚟熨衫   咁之後入廚房煮餸   仲以為洗衣機無啦啦停又壞咗   原來係已經洗完   原來自己做咗個幾鍾頭嘢   真係唔覺囉   煮完就即沖涼   里奧大人差唔多 9 點先番   所以我特登留起啲炒飯陪佢一齊食呢 ~

是日晚餐 - 馬拉盞茄子豆腐 + 蔥花叉燒炒飯

馬拉盞茄子豆腐 - 第一次咁整   不過加咗 2 湯匙辣豆板醬   所以好惹味   但里奧大人話辣   依樣嗰樣想唔食   我有啲火話你知唔知我煮一餐飯要用幾多心機㗎   最後佢都食哂囉 ~

蔥花叉燒炒飯 - 上次見里奧大人都鍾意食鴻星整嘅超多蔥楊洲炒飯   所以我咪整囉   不過無蝦   但一樣好好味   哈哈 ~