什豆極辛出前一丁 + 煎薄撐 + 蓮子陳皮紅豆沙 ( 16-FEB-2012 )

( 16-FEB-2012  THU )

今日開始轉飲檸茶   不過假期又會飲下咖啡過心癮呢 ~

忙咗陣就 Hea 喇   個人一攰   覺得好有渡日如年嘅感覺 ~

晏晝有 Lunch Box   其實之前都講過話菜唔好叮   不過我都會照叮菜囉   我唔可能有肉無菜   我次次如果食啖啖肉   我會覺得周身唔舒服咁 ~

好難先等到放工   真係有時悶到咩 Mood 都無哂 ~
  
里奧大人要見客   又係唔知幾時番   所以我自己食麵先   之後做埋家務   今晚終於頂唔順喺房開抽濕機   抽濕完成間房爽哂   真係好怕啲嘢噏噏濕濕咁 ~

是日懶餐 - 什豆極辛出前一丁 + 煎薄撐 + 蓮子陳皮紅豆沙

什豆極辛出前一丁 - 估唔到都有少少辣喎   不過點都唔夠辛辣麵辣囉   其實就咁加什豆已經好好食   不過里奧大人就肯定唔制   佢唔鍾意食青豆   但各種蔬菜都有唔同益處家嘛 咩都要食啲先得呢 ~

煎薄撐 - 其實想清埋包 200g 低粉   跟食譜做法   不過原來煎出嚟好厚身   完全無薄撐 Feel   咁個底部都煎到金黃哂   但上面仲係漿   我剷起之後完全一舊舊散哂   我又唔識拋鑊   大佬   五層鑊好重嘛   之後唔想浪費   所以轉用 Grill Pan 再煎未熟嘅部份   本來又想拋個 Pan   不過都係好鬼重   同埋有糯米粉關係   黐住哂好難煎   下次都係分開 2 份嚟煎先   咁難得我煎薄撐   賣相唔掂都留番少少比里奧大人試呢   佢話味道 OK   不過就濕咗啲喎 ~

蓮子陳皮紅豆沙 - 之前驚咗食紅豆沙   但呢排又好想食喎   所以自己煲   不過無起沙囉 ~

今晚里奧大人 9 點幾就番到屋企   不過我無煮到飯   所以叫佢買麥當勞   再陪下佢傾下偈   一齊食薯條   咁樣我已經好滿足㗎喇 ~