泰屋 @ 佐敦 ( 20-FEB-2012 ) + ( 21-FEB-2012 ) + ( 22-FEB-2012 )

青木瓜沙律 - 我依家鍾意食呢啲沙律   酸酸甜甜又爽口   好開胃呀

黃咖哩雞 - 我覺得無咩味   唔知係咪食慣濃味嘢   但阿 Mi 話好鹹   叫我飲啖   就咁飲真係好鹹   但點包就唔覺囉

原味烤包 - 一上枱心知不妙啦   咁巨嘅   肯定食唔哂

蒜蓉烤包 - 聞就有好香蒜蓉味   但食落無咩味   同埋我覺得個包好厚   唔夠脆呢 

椰汁木薯 - 呢個甜品永世難忘呀   甜到打冷震   木薯又甜啲椰汁凍咗就更加甜   甜到好難頂   好在阿 Mi 食咗好多   知我唔想食嘛   幾驚話邊個叫邊個要食哂呀   哈哈  

阿 Mi 送嘅生日禮物   好在番到屋企無爛無穿   個盒同餅都完整無缺

( 20-FEB-2012  MON )

今朝又同 8 卦食早餐   佢有運行啦   因為我請佢食早餐   我仲咗大獎嘛   都好想同佢一齊分享下   同埋佢對我真係好好呢 ~  

潮潮濕濕   個人特別攰   到 Lunch Time 出去行陣再買飯盒番菇場食算喇 ~

終於每月一到啦   唔怪得今日無啦啦咁攰   原來如此 ~

今晚阿 Mi 請我去泰屋食生日飯呀   所以約咗 6 點15 分喺佐敦地鐵站等埋我   驚我唔識路呀 ~ 

阿 Mi Book 咗 6 點半   去到時間啱啱好啦   但居然要坐正門口位   無理由 Book 咗位會坐門口家嘛   所以我唔想坐呀   佢再安排我哋坐入少少囉 ~

一坐低阿 Mi 就比份禮物我呀   超驚喜呀   因為有飯食仲有禮物收喎   唔開心就假呢   真係客氣   係都要我記得妳 ~

之後就一齊睇 Menu 食咩   不過我每月一到   所以其實無咩胃口   最緊要唔好叫辣   其實真係第一次食泰菜唔食辣囉   超唔慣呀 ~

點完菜就傾喇   一路食一路傾   雖然平時都喺網絡上傾偈   但當面傾計都好多嘢傾喎   同埋我同佢背景真係好似   所以仲更加啱傾   真係唔駛講多句   佢都會好明白我咁 ~  

其實我真心朋友真係唔多   我已經唔會咁易講自己嘅嘢比人聽   好驚受傷害呀   因為之前試過係咁嘛   都係唔講咁多嘢好啲   要保護自己   所以識到阿 Mi 真係好開心   其一佢口密   其二同佢一齊唔駛造造作作   真係有咩講咩   佢會好 "用心" 聽妳講嘢   有咩問就即問   佢會好 "用心" 答妳嘢   咁大家自自然然就會了解多咗呢 ~

食呀食傾呀傾都差唔多 10 點   里奧大人又打嚟   阿 Mi 應該可能覺得里奧大人催我走呢   哈哈   所以阿 Mi 話走喇   我聽日要番工嘛 ~

一齊行去搭地鐵   轉車之後就各行各路喇   我無啦啦好想嘔呀   超勁好想快啲番到屋企   之後有啲暈   勁想叫里奧大人嚟接我   不過如果叫得佢嚟   其實我急步都好快番到屋企 ~

一番到屋企即除鞋   同里奧大人講好暈要抖陣   之後我瞓咗半個鐘就醒咗   見到里奧大人原來未沖涼   佢話驚我有事所以唔敢沖   我見到佢個對眼皮塌哂落嚟咁呀   個心好痛呀   之得唔話暈啦 ~

( 21-FEB-2012  TUE )

每月一到啦   所以請病假休息   我覺得沖完熱水涼再瞓覺係最好嘅止痛方法囉 ~

差唔多 5 點就去睇醫生   買咗包熱嘅蜜瓜豆奶   飲完個肚好暖好舒服呀 ~

番到屋企又沖熱水涼   之後睇電視   睇下瞓下咁囉   之後有啲 餓   食咗個芒果   又甜又多汁   好好味呀 ~ 

里奧大人差唔多 10 點先番到   佢番嚟我都即入房瞓 lu ~

( 22-FEB-2012  WED )

今朝瞓到 8 點半起身   沖個熱水涼   其實個肚唔痛架喎   但唔知點解一出門口就開始痛 ~

真係邪   好日唔搭的士   一搭就大塞車   平時 $3x 就番到菇場   今朝要 $5x ~

買咗腿治同咖啡   不過無胃口   諗住飲啖咖啡精神啲   點知飲完超反胃   嘔咗幾次   咩力都無呀 ~

個肚又痛   又攰   所以晏晝再請病假番屋企休息 ~

好在醫生 1 點前都可以睇   放工即搭的士   睇完就番屋企沖完瞓覺   一瞓就瞓到 6 點   之後唔敢再瞓 lu ~

覺得有啲餓   食埋今朝嘅腿治   覺得勁口渴   所以食埋個梨   咁就超級飽喇 ~

坐喺梳化真係好易瞓着   里奧大人差唔多 11 點先番到屋企   真係開完門比佢   望咗佢一眼我就要入房瞓喇   雖然兩個人住埋同一間屋   但真係唔係好多相處時間咋 ~