銀咖哩 @ 九龍灣 ( 30-SEP-2015 )

( 30-SEP-2015  WED )

今朝鬧鐘響   仲諗緊今朝係咪要起身番工   咁即係瞓得好淋下啦   唔知發生咩事咁   哈哈 ~

早餐唔可以食咁飽   因為里奧大人晏晝同我食 Lunch   咁菇場有 Urgent 嘢要做   諗住食完就走   點知 8 卦又嚟埋   咁等埋佢啦   之後 8 點 50 分都即走人喇 ~

忙到爆炸   一單接一單   做到慶合合呀真係   明明好凍都要除褸呢 ~

里奧大人晏晝要去深圳見客   所以陪我食 Lunch   其實我驚今日會落雨   叫佢唔好嚟   不過佢話我唔想同佢食咁喎   但其實我唔想佢樸嚟樸佢囉   又揹住大背囊   又焗熱   唔想佢咁辛苦咋 ~

同佢食酸辣米線   佢話肥仔好食啲   不過就勁口渴   呢間都 OK   但啲豬腩肉係無咩味   咁我話係㗎   唔好要求咁高啦   好在杯凍咖啡好飲咋   因為好濃咖啡味   估佢唔到   因為我平時唔飲㗎   飲埋真係爆肚都似 ~

我嘅豬軟骨酸辣米線 (小辣)

里奧大人嘅蘿蔔豬軟骨酸辣米線 (小辣)

食完行陣 Mikiki 就走喇   諗住帶里奧大人坐 Shuttle Bus   點知我睇錯時間   哈哈   最後都係要行路去地鐵站   辛苦了 ~   

4 點幾終於搞掂哂所有嘢   可以抖下喇 ~

放工去德福   好感恩里奧大人 6 點半都到咗德福   去埋旅行問資料   之後就去食嘢 lu ~

諗住去稻香打邊爐   但好多人呀   所以去銀咖哩食飯算喇   食完就去舖頭拎嘢就打的番屋企 lu ~

換埋對鞋就一齊去徑步   徑咗半個鐘   本來想再徑   不過好焗熱   都係番屋企沖涼好啲 ~

沖埋涼就睇戲   聽日放假   又睇到 12 點幾先瞓 ~   

燻蹄 (外賣) + 唐生菜 ( 29-SEP-2015 )

( 29-SEP-2015  TUE )

終於要番工喇   不過今朝起身都無難度   因為菇場有嘢未做完   我想快啲番工清哂去呢 ~

早餐食熱狗餐   雖然麻麻哋好食   哈哈 ~

番到菇場都預咗忙   忙到 11 點   諗住忙完   點知對手無停過 ~

Lunch Time 出去食粥   因為難得好天氣   想出去行下   唔係之後幾日落雨無得行呢 ~

及第粥

超級超級勁忙呀   不過真係好攰   所以做到 5 點都要抖下   留番聽日再做過 ~

放工去 Taste 再買多 Pack 辛辣麵比里奧大人   之後番屋企 lu   今晚唔駛點煮   所以可以有時間睇報紙   爽呀 ~

里奧大人 7 點幾放工   咁我煮佢想食好耐嘅辛辣麵   等佢開心下   因為今晚無咩點煮嘢   好似好懶好衰咁   所以要對佢好啲   哈哈 ~

是日懶餐 - 燻蹄 (外賣) + 唐生菜 

燻蹄 (外賣) - 無啦啦好想食呀   之後家姐又係話 "妳真係好鍾意食燻蹄"   我認㗎   呵呵 ~
  
唐生菜 - 尋晚整番 2 棵   今晚清埋去 lu ~  

9 點出去徑步   番到屋企都 10 點   沖埋涼真係要休息喇 ~

又叫里奧大人食雪糕月餅   佢一口答應   如果叫佢食菜係咁就好咯 ~

11 點唔夠即瞓   今晚真係好攰呀 ~

滷水雞翼 (外賣) + 唐生菜 + 粉葛豬骨湯 ( 28-SEP-2015 )

( 28-SEP-2015  MON )

今日係中秋補假   唔駛番工真係好開心   哈哈 ~

9 點半起身   媽咪工人放假呀   所以我又買早餐比家姐食   順便陪下佢   咁里奧大人就要去姑奶屋企度電視機 Size   所以今次打的喇   唔駛轉車咁麻煩 ~

食完早餐又傾下偈   差唔多 12 點里奧大人就打嚟話嚟緊   估唔到啲時間過得咁快   差唔多 1 點就同埋媽咪一齊飲茶   飲到 2 點半都番屋企喇   因為工人番咗嚟   同埋媽咪要食藥呢 ~

坐到 3 點就一齊走喇   之後我去買餸   里奧大人去訂電視機 ~

今日都好焗熱   真係唔願郁   但里奧大人好好喎   主動幫我熨 2 機衫   我可以做少樣家務   呵呵 ~

約咗家姐 5 點半拎湯   番到屋企抖多陣就煮嘢喇   今晚要去徑步呢 ~

是日懶餐 - 滷水雞翼 (外賣) + 唐生菜 + 粉葛豬骨湯

滷水雞翼 (外賣) - 懶到出汁   所以買雞翼做餸   哈哈 ~ 

唐生菜 - 又係懶人首選   浸又快淥又快   好鬼愛佢呢 ~  

粉葛豬骨湯 - 家姐煲㗎   佢話依家代替媽咪煲湯比佢   其實真係多得媽咪同家姐   如果唔係我唔會有咁多湯水飲呢   真係搬番出嚟住   先有咁多湯水飲   因為媽咪家姐成日覺得我好慘   成日無湯飲 ~

8 點出去徑步   見到大月亮   所以徑 20 分鐘就番屋企拎腳架再影   不過原來都影唔到   最搞笑隔離個女人又係拎腳架   佢都影唔到   咁我地都唔再 Set 嘢喇   番屋企沖涼好過    好鬼熱呢 ~

都係影到好散

走人 lu

沖埋涼就抖陣   11 點唔夠就瞓喇   因為聽日要番工呢 ~    

百樂門國際宴會廳 @ 九龍灣 ( 27-SEP-2015 )

( 27-SEP-2015  SUN )

今朝 9 點 15 分已經醒咗   咁都起身 lu   之後去麥當勞食早餐 ~

食完番屋企抖下就番教會   崇拜完畢之後就去價真棧買即食麥片同乳酪   要開始減下肥 lu ~

無啦啦好攰呀   所以 Hea 到 2 點半就去大快活食 Tea   因為我要飲凍咖啡啊 ~

我食食下同里奧大人講   如果我死咗   你實好孤單好可憐   之後佢同我講話 "自古美人如名將  不許人間見白頭"   所以叫我放心   我會好長命嘅   我仲好認真話啲人真係好慘   可能成日要用腦   所以唔會長命   佢笑住話係呀係呀   頂佢吖   後尾終於清醒   知佢講咩啦 ~

頭先喺價真棧   里奧大人好似好想買辛辣麵咁   不過 $29.9/Pack 又唔係平   所以我去 Taste 睇下   估唔到做特價 $23.9/Pack   所以買 Pack 先   之後買 Unsalt Butter   因為之前睇係 $27.9/件   買二送一好似好抵咁   比完錢 Check 單   心諗點解兩樣廿幾蚊嘢   最多咪五十幾   點解七十幾咁貴   仲想番轉頭問點解只係減一件 $27.8/件   唔係減兩件咩   好在停一停諗幾諗咋   唔係真係勁樣衰呢   因為我一心以為 $27.9 有三件呀   嗚嗚 ~  

4 點飲湯   抖到 5 點半就出發去百樂門   今晚同九龍姑奶門做節食飯   食到 8 點幾就走喇 ~

家姐煲比我嘅青紅蘿蔔豬骨湯

我同里奧大人行去 megaBOX 睇行山杖   好感恩喺 PROTrek 買到合心水嘅   $249 有 9 折   即係 $224   買完再周圍行   不過無咩人行   超勁舒服   哈哈 ~

本來諗住行路番屋企   但好難得 Shuttle Bus 唔駛排隊   所以最後都係坐 Shuttle Bus 番屋企 lu ~ 

超勁熱   番到屋企即沖涼   之後開機洗衫 ~

今晚要應節   所以食月餅   其實想快啲清哂去   不過我唔食咁多凍嘢喇   比哂里奧大人食算   等佢每晚一個   哈哈 ~

睇下電視睇下雜誌   好快又 12 點   又要瞓喇 ~ 

大家樂 @ 九龍灣 ( 26-SEP-2015 )

沙爹湯底  

實在太飽   所以成碗烏冬無食過   所以要拎走呢 

( 26-SEP-2015  SAT )

今朝瞓到 10 點 15 分自然醒   但其實 8 點已經醒醒哋   因為係一覺瞓天光   但無理由 8 點咁早起身家嘛   所以再瞓過 ~

里奧大人就 10 點已經起咗身   仲開埋機洗衫   咁之後我哋刷牙洗臉   差唔多 11 點先落樓食早餐呢 ~

頭先明明好好太陽   食完早餐之後   個天就暗哂   本來去長洲行下   依家唔喇   改去荃灣   因為如果荃灣唔落雨   咁就可以去行山   如果無得行   就去行街買嘢   此乃進可供退可守也   哈哈 ~

坐小巴去官塘   再由官塘坐小巴去荃灣   真係勁嘥時間勁嘥錢   哈哈   但我同里奧大人講話唔想坐地鐵   地鐵應該十蚊雞之內   但坐兩程小巴加埋要 $17/人   下次我都係坐地鐵算   因為感覺兜嚟兜去好嘥時間咁   哈哈 ~

去到荃灣已經 1 點幾   我想剪髮呀   所以打比剪髮表妹   佢叫我 3 點再去佢度   但我話修前面啲頭髮   所以佢叫我 20 分鐘後到就可以㗎喇   行行下居然見到 Miniso   咁又去買啲嘢啦   上次去東門買咗條抹手巾   家姐好鍾意   咁我就入去睇下有無囉   估唔到又有喎   不過係唔同款   同埋 HK$15/條都 OK   但最正係有家姐一生中最愛嘅紫色   因為我唔鍾意心心圖案   所以買 1 條比佢先   下次見到係衫仔款再買多條比佢 ~

條街超級勁焗熱呀   所以去買杯百香果 QQ   再買多杯珍珠奶茶比表妹   去到可以即剪   唔駛 5 分鐘搞掂   之後就走人喇   呵呵 ~

原來已經 2 點幾喇   里奧大人話可以食嘢   咁食啦   其實頭先一嚟到荃灣已經話食嘢   大佬   我有食力   但都唔能夠兩個鐘頭食一餐囉 ~

今次試下蘭洲拉麵   家姐話唔好食   不過我都想試下   點知真係唔好食   哈哈 ~

紅燒雞翼刀削麵 - 我覺得啲麵都唔煙韌   直頭覺得有啲硬添呀   所以食到一半唔想再食   

五香牛展上海麵

我覺得啲醬都唔辣嘅

炸雲吞 - 香口但唔覺得好食        

食完就去南豐廣場   有個特買場買家品   啲嘢真係勁抵   又買咗啲咁啦   之後去旅行社睇資料   睇完再行去千色店睇嘢   再去唔知咩醬園買辣麵豉同酸梅   唔駛下下去街市買   呵呵 ~

$5/支   勁抵   所以買咗 6支   其中 2 支比家姐 1 支就比媽咪     

隔熱墊 ($18)   想買呢啲隔熱墊好耐   所以見到即買   同埋買咗 2 對超長筷子  好似 $5/對咋   用嚟炸嘢就最好呢    

家姐無啦啦 Send 咗呢張相比我   麥包瞓到咁好搞笑呀

再行多轉小巴站對面嘅商場   經過馬拉松見到 Cross 只係 $249   咁買啦   里奧大人成日叫我買   話 $299 已經抵喎   咁依家 $249 再有會員價   抵上抵呀   好感恩呢 ~

行下又見到羊皮短靴   今次係里奧大人買㗎架   清貨價 $399   呢個真係抵喇   個款又靚   之後再用優惠價 $100 買多條羊皮皮帶就走喇   因為都已經 5 點半喇   約咗家姐 6 點拎湯比我嘛   所以即坐小巴番屋企喇 ~

約家姐喺停車場交收   又醒咗張 Häagen-Dazs 雪糕 coupon 比我   呵呵   不過 11 月到期   真係要記得食咯 ~

番到屋企抖陣   我勁想打邊爐   不過里奧大人唔想   咁就去大家樂啦   可以打一人邊爐呢 ~

食完又行陣商場   里奧大人又入去允記睇 Cross   佢終於又忍唔住買多對啦   話 $299 真係抵   唔買唔得   佢真係唔知兩年定三年   已經買咗 4 對 Cross   初初佢唔鍾意大頭   依家就覺得舒服喇   同埋最正係可以着完用水洗   夠哂方便同埋乾淨好多   不過始終係膠嘢   個底會好快蝕囉 ~

呢期勁愛梳乎蛋   所以見到有舖頭買佢嘅產品就即去睇   所以我叫里奧大人周圍行   我想睇哂所有嘢嘛   如何佢喺度   會成日催住哂   好煩呢 ~

唔記得呢 2 個 Folder 幾錢添   好似 $8 同 $10   

呢個坐枱月曆只係 $35   同埋我真係有用   所以里奧大人話買呢   

我買完之後就周圍行   咁啱轉彎見到里奧大人   正想叫佢嘅時候   佢入咗間舖頭   之後又出番嚟   咁我知佢係買 Chopper 比我㗎喇   我唯有扮見佢唔到啦   所以等佢自己比個 "驚喜" 我啦 ~

之後我打比佢約喺邊度等   一見到佢   我問佢拎住啲咩   佢話送比我嘅中秋節禮物   哈哈   不過我話其實一早見到佢啦   佢唔信呀   好在我有影相   呵呵 ~

呢隻係之前可以 7-11 換購   不過又係儲印花再抽   我其實覺得直接買仲好囉   而後面果隻係舊款   老闆同里奧大人講   問下我鍾唔鍾意先買   因為一開咗盒就無得退   但里奧大人話照買   其實我都有啦   家姐之前買咗比我㗎喇   我放喺菇場之嘛   之後我頭先叫佢啦   唔駛嘥錢   但里奧大人話無所謂喎   擺喺屋企都好吖   反正我鍾意   

番到屋企即沖涼   之後睇戲喇   又係 12 點幾先瞓 ~