自家制叉燒 + 蠔油燜節瓜 ( 23-SEP-2015 )

( 23-SEP-2015  WED )

尋晚都係瞓得唔好   最衰自己懶   唔係想煲啲安神茶飲下   睇下有無果效呢 ~

早餐食芝腿治   依家唔要大火   反而啲多士就大火   真搞笑 ~

菇場唔忙   呢排攰呀   唔想忙囉 ~

Lunch Time 出去譚仔食麻辣米線   之後就周圍行   行哂惠康萬寧屈臣氏百佳   家姐話乜附近咁多嘢行   叫我唔好再行   快啲番工   黐線咩   行下之嘛   又唔係樣樣拎嚟睇   行哂幾間嘢   番到菇場都係 1 點半   都無遲到 ~ 

豬潤麻辣米線 (3 小辣)

邪爆   無啦啦好忙呀   好在個幾鐘就做完咋 ~

頭先食完辣嘢   又好想食番啲甜嘢   咁啱 8 卦話想食月餅   咁就一齊去 Pantry 食   我叫佢開個五仁   佢話唔食㗎   之後我話點解唔食   佢話只係鍾意食傳統月餅   講極佢都唔食   之後我話食啦   咩都試下嘛   佢話佢都唔鍾意食   唔駛試   我好慘咁話我聽日自己開嚟食囉   之後佢番轉頭話開啦開啦   妳啲人真係   我第一個反應話佢 : 你唔係 ?!   哈哈   佢一路啤住我一路笑   我真心覺得佢係女人   我係男人   因為佢成日話我講嘢麻甩過啲麻甩佬   哈哈 ~ 

冰姑成日話五仁好味   煙韌有咬口   但我唔買家嘛   咁菇場有就想試   點知奇華嘅五仁月餅完全唔掂   乾爭爭   唔煙韌   真係超勁失望啦   

今晚放工就直接番屋企   實在太開心喇 ~

煲好飯   焗埋叉燒就開機洗衫   之後熨 2 機衫再抹書房   搞掂哂都 7 點半喇   要快快煮嘢呢 ~

里奧大人 8 點幾先放工   咁我都半食半等   因為太多飯   同埋晏晝食咗 2 件月餅好滯   所以要慢慢慢慢食囉   嗚嗚 ~

是日懶餐 - 自家制叉燒 + 蠔油燜節瓜

自家制叉燒 - 里奧大人話好味   不過啲肉有啲韌   我話係咁架啦   所以就係出街食同自己整嘅分別   哈哈哈哈哈   但我其實覺得真係關嚿豬肉事囉   我話明要半肥瘦梅頭   豬肉姐話呢嚿整叉燒先好味   咁我信佢啦   但我真係覺得唔夠肥   下次都係再上網睇下人哋買啲咩豬肉先 ~  
          
蠔油燜節瓜 - 今次煮得好趕   所以好求其煮   落得太多水啦   完全無色無味 ~ 

今晚真係煮多好多飯   所以又要擺好 d   等里奧大人食得開心 d   哈哈   但其實我都覺得好多飯   所以佢話多飯   我都要承認   如果平時   我一定鬧鬼佢   哈哈 ~

搞掂哂再抹鞋櫃   因為實在太飽   抖多陣就沖涼   之後休息喇 ~

頭先同里奧大人講話熨咗 2 機衫   佢話乜有 2 機衫咁多咩 ?!   之後佢搵衫   無啦啦話真係熨咗好多衫喎   呃你有金執咩 ~

大家都勁攰呀   所以 10 點 45 分即瞓喇 ~