蕃茄肉碎扁意粉 + 粟米蛋花湯 ( 17-SEP-2015 )

( 17-SEP-2015  THU )

尋晚半夜醒咗兩次   勁驚瞓唔番   始終尋日瞓得太多嘛   感冒係要瞓   瞓得多真係快好番   但就瞓到腰骨好痛囉 ~

其實背脊都痛   應該係骨火啩   鼻水都收咗 9 成   但喉嚨反而有啲唔舒服   希望快啲好番啦 ~

早餐唔太餓   咁食奶醬多算喇 ~

菇場唔忙   不過 11 點開始個肚係咁打鼓   真係有聲㗎   好在同事聽唔到   呵呵 ~

一到 Lunch Time 即去買酸辣米線   但都覺得無咩味添 ~

仍然 Hea 等放工   今晚去街市買餸   行嚟行去格價   好鬼熱呀 ~

番到屋企都已經 6 點半   即煲青木瓜水   再開機洗衫   搞掂哂就煮嘢喇 ~

煮完嘢都差唔多 8 點   里奧大人啱啱打嚟話放工   不過我唔餓呀   所以只係飲粟米湯   飲完抖陣就沖涼喇 ~

是日晚餐 - 蕃茄肉碎扁意粉 + 粟米蛋花湯  

蕃茄肉碎扁意粉 - 無啦啦勁想食蕃茄   咁就煮呢個意粉啦   煮蕃茄茸嘅時候就開始後悔   因為又要煮意粉又要炒洋蔥炒肉碎   太多嘢做喇   哈哈 ~  

粟米蛋花湯 - 又係勁想飲湯   滾湯就唔好搞喇   粟米湯就 OK   最緊要快 ~

等埋里奧大人沖涼就食榴槤   因為唔食唔得喇   開始出水呢 ~

家姐喺沙巴 Whatsapp 我睇貓山王   我話妳又知係貓山王 ?!  佢話味道好似   之後我話點解妳話覺得似嘅 ?!   佢話我之前買過比佢食   我真係唔記得買過比佢食添

有啲好細核   但有啲又好大粒核   因為我哋同影子食嗰啲係好細粒核   因為影子識揀   但家姐只係叫人留個比佢咋   佢唔識揀呢

今晚我 11 點都自己瞓先喇   難得有睡意 ~