芝麻海蜇手撕雞 + 雜丸椰菜炒油麵 ( 10-SEP-2015 )

呢隻蒜蓉辣醬喺張家界買㗎   都幾辣

( 10-SEP-2015  THU )

真係有咩方法令自己瞓得好啲呢   下下半夜醒咗都幾難搞咯   呢排瞓得唔好   濕疹又番嚟探我 ~

早餐食奶醬多  好耐無食   覺得好甜咁呢 ~

菇場唔忙   Hea 埋今日   聽日要 Pack 箱喇 ~

同冰姑傾開花生辣椒   搞到我勁想食花生   所以食重慶酸辣米線   因為有花生食呢   哈哈 ~

其實應該叫紅薯粉   咁樣仲好味呢   

食完去萬寧買嘢   好在真係拎咗環保袋咋   因為無諗過萬寧有 9 折   咁就唔同講法喇   要買好多嘢呢 ~

Choco Pie 係買比工人嘅   出位價好抵   只係 $8.9/盒咋   

旅行三寶 (感冒 Panadol $59.9 / Hot Lemon $47.9 / 清熱酷 $19.9)

杏仁朱古力餅捧 $6.5 / 酸糖 $17.9

番到菇場仍然 Hea   呵呵   放工就去街市買餸   今晚行咗好耐搵海蜇同青瓜   所以番到屋企要抖陣先預備呀 ~

蒸好雞肶之後   同家姐傾咗陣電話   一望個鐘已經 7 點幾   要即煮嘢喇 ~

8 點 15 分終於搞掂   里奧大人啱啱放工   咁我自己食先喇   唔想 9 點先食嘢呢 ~

是日晚餐 - 芝麻海蜇手撕雞 + 雜丸椰菜炒油麵

芝麻海蜇手撕雞 - 用雞肶算喇   唔駛撕咁多   哈哈   今次勁喇   走遍天南地北   買齊哂芝麻海蜇   但我開包芝麻嘅時候   先醒起屋企原來有包芝麻   真係激鬼死   一包芝麻真係有排食   依家仲有兩包 ~  

雜丸椰菜炒油麵 - 其實我好攰   同埋唔想切椰菜絲   不過勁想食炒油麵   所以點都要炒嚟食囉 ~

我同里奧大人講話想食雪糕   想今晚好瞓啲   咁佢食完飯   等埋我洗碗就陪我去食雪糕   我同佢講   話唔好同管理員講話出去食嘢   話買嘢好喇下   唔係好似好為食咁 ~

坐低食咗兩啖雪糕   問里奧大人屋企有無開住冷氣   佢話有開   咁我話番屋企食好過   之後佢就笑啦   話仲叫佢唔好同人講去食嘢   依家拎住兩杯雪糕呀   呃唔到人啦   哈哈 ~

食埋就沖涼   睇多陣電視   11 點 15 分瞓覺 ~