丸龜製麵讚岐烏冬專門店 @ 九龍灣 ( 1-SEP-2015 )

熱醬油烏冬 (中) + 野菜天婦羅 + 南瓜天婦羅

熱醬油烏冬 (大) + 蕃薯天婦羅 + 椒鹽魷魚鬚

( 1-SEP-2015  TUE )

今朝又係灰灰暗暗   又係無落雨   好在唔係好焗熱呢 ~

早餐食奄列   食完打陣機又要番工 lu ~

菇場忙下停下   8 卦又係咁講講講   真係長氣過女人   咁都好   時間過得好快   哈哈 ~

晏晝同 8 卦出去譚仔食米線   佢都幾好嘅   之前話佢唔同我去譚仔   佢就記到依家   係都要食到為止㗎   其實佢呢方面都幾似里奧大人   我一講話食咩   佢地會記住   有時我講完都唔記得添   因為我實在太多嘢講嘛 ~

由我做完手術開始   我一食辣呢   8 卦就嘈我㗎喇   就算係胡椒粉都叫我唔好食   所以佢話只可以食清湯   但我話一定唔會清湯   最多要 10 小辣   佢話已經放寬咗我   黐鬼線 ~

食完再行 759   見到 $15.9/包即買 2 包比家姐

諗住 Hea 過   點知要做 Report   又要對一大堆數字   睇見都眼瞓   哈哈 ~

放工去探媽咪   不過媽咪無胃口   話作感冒   不過我摸下佢又無咩嘢   血壓又正常   之後佢話尋晚瞓得唔好囉 ~

咁啱家姐打嚟問媽咪點樣   我話佢知媽咪點點點   傾完之後   工人好緊張同我講話唔知媽咪唔舒服   我話媽咪話瞓得唔好   唔駛緊張呢   佢話可能媽咪晏晝成日瞓   夜晚瞓唔到   咁都係嘅   之後佢話依家每榨鮮橙汁比媽咪飲   夜晚又會比盒奶比媽咪飲   佢真係好驚媽咪唔食嘢   驚到自己都食唔落   我話佢自己點都要食嘢架   自己都要有健康嘅身體嘛   佢又會幫媽咪祈禱   同我講話要多啲祈禱   咁就無咁驚   佢仲話佢尋晚打比爸爸   爸爸話唔係咁舒服   之後佢夜晚不斷祈禱   第朝再打比爸爸   爸爸好大聲講話無事喇   所以工人叫我記得祈禱   咁就唔駛驚㗎喇 ~

坐到 7 點就走喇   又拎咗啲生果   工人好搞笑   佢好公平㗎   明明媽咪話比哂 4 個蘋果比我   但佢點都要留番 2 個比家姐   同埋一定將所有生果分開 2 份   有次有 3 袋牛肉   因為媽咪話比哂我嘛   咁我拎啦   之後工人話比包家姐   咁我求其拎啦   一拎就一拎咗兩包大嘅   之後工人就拎番一袋大嘅比家姐   比番袋細嘅我   佢真係好錫家姐   咁又係嘅   家姐買嘢比自己工人   媽咪工人實有份   搞到自己工人都呷嘈添呀   哈哈 ~

一落樓就收到里奧大人話放工   咁我行陣 Taste 再去攞位 lu ~

食完再食雪糕   今次係我想食雪糕   呢排瞓得好差   希望食啲甜嘢   夜晚會好瞓啲啦 ~

番到屋企   里奧大人話抖陣去徑步   不過我唔徑喇   所以我又再落樓去書局睇食譜   諗住買比工人睇   等佢煮比媽咪食呢 ~

沖埋涼就食生果   咁就已經 10 點喇   之後同里奧大人一齊睇 "夜班"   睇完就瞓覺 lu ~