蕃茄海鮮扁意粉 + 有機菜心 ( 17-OCT-2017 )

( 17-OCT-2017  TUE )

今朝里奧大人 7 點要起身喇   因為 9 點要去到葵芳見客   咁我起身嘅時候   佢都要出門口 lu ~

早餐食芝蛋治   其實個肚仲係搞搞下咁   再唔舒服就真係睇醫生喇 ~



菇場忙啦   之前幫阿豪做啲嘢   話明得閒先做家嘛   佢今朝居然催我做   真係吖   我都要搞掂哂自己嘢先得嘛 ~

Lunch Time 又未餓   所以出去買菜   之後再買燒賣腸粉番菇場食   正 ~

仍然忙啦   但時間又唔係話過得快喎   但已經做咗好多好多嘢㗎噃 ~

4 點幾個天黑哂   再望出出面   突然覺得勁有冬天 Feel 呀   我鍾意冬天多啲   因為啲衫可以遮肥肉   同埋個人心情都好啲咁㗎   無咁燥底   哈哈 ~

放工即走   番到屋企又預備晚餐   好在預備咋   里奧大人明明話放工約同事傾哘    所以會晏啲番   點知 6 點半就話番緊屋企   佢話個同事傾咗兩句   無啦啦又話要走喎   黐線 ~

里奧大人一入屋就話好香呀   因為我啱啱用蒜蓉爆開啲海鮮   難得佢話好香   真係好開心㗎   雖然無難度   呵呵 ~             

是日懶餐 - 蕃茄海鮮扁意粉 + 有機菜心

蕃茄海鮮扁意粉 - 呢個真係懶人餐之一   如果唔用新鮮蕃茄   真係好快可以搞掂   好味又方便   正呀 ~

有機菜心 - 個菜佬係咁強調話係有機菜有機菜   咁係乜菜先得架 ?!   所以我忍唔住問佢係咩菜囉   佢話係菜心   但我覺得 $11/斤就應該唔係有機菜囉   不過我都想試下   我覺得無咩菜味喎 ~

搞掂哂就拖地抹嘢啦   個肚仲係搞搞下咁   所以唔去徑步 lu ~

沖埋涼都差唔多 9 點   係時候要休息喇   里奧大人 10 點都瞓添呀   聽朝要好早起身上大陸 ~

我就睇電視   睇到 11 點幾先瞓   其實唔眼瞓   不過好凍   都係想捐入被竇暖啲呢 ~