腐乳唐生菜 ( 23-OCT-2017 )

( 23-OCT-2017  MON )

雖則話今朝急降到 21 度   但又唔多覺凍咗好多   可能呢幾日都係涼涼哋咁   呢啲天氣勁舒服   要是唔駛番工   日日行山都唔錯   不過就乾燥咗啲   唔係就正喇   哈哈 ~

早餐食芝腿治   咁 8 卦到咗先   我一嚟到   佢都示意我唔好坐咁近   因為佢感冒   但其實衰龍都唔舒服㗎   8 卦話佢坐 Shuttle Bus 就戴口罩   但番到菇場又唔戴㗎喎   真係好奇怪囉   同埋佢真係超級勁自私   佢次次一聽到人哋咳就好大反應   驚死傳染佢咁   但佢次次病又唔會戴口罩囉   勁衰格  ~



菇場唔太忙   但瞓得唔好   所以個人好攰咁 ~

Lunch Time 出去買車仔麵   買完又唔想食   同埋食到一半已經覺得好滯咁   可能食銀針粉啦   唉 ~



仍然 Hea 過等放工   番到屋企抖陣   之後就去徑步   因為仲係好飽囉    徑半個鐘就番屋企 lu ~

沖埋涼   差唔多 8 點先食嘢   今晚食 2 棵生菜同飲碗湯就算   估唔到咁樣都好飽下 ~

里奧大人同姑奶們食飯   食到 9 點幾就番屋企了   之後話公司啲同事又向人打毒針   所以同事真係好緊要   好似我之前個 Partner 咁   懶到出汁   成日開工瞓覺   比人感覺我哋部門好得閒咁囉   好在我做嘢快手   佢就永遠拖到最 Last Min 先做   如果唔係   啲人都覺得我係同一類人嚟囉 ~

咁聽日里奧大人又要上廠   真係傾完偈   等埋佢沖涼   同佢一齊祈禱   之後佢都要瞓喇 ~

我就 11 點半先瞓   呢排夜晚唔會話眼瞓   但瞓又瞓得唔好   可能擔心里奧大人工作方面   始終我真係幫唔到佢解決   我唯一一樣可以做嘅   就係不斷為佢祈禱   求神加力比佢呢 ~