韓汁焗五花腩 + 節瓜鹹蛋魷魚湯 ( 5-APR-2018 )

( 5-APR-2018  THU )

今朝里奧大人 9 點半起身   佢約咗姑奶食早餐同比嘢佢   我唔去喇   假期只想見自己鍾意嘅嘢 ~

我梳洗完就去食早餐   之後去超市買嘢   番到屋企都已經 12 點半了 ~



里奧大人差唔多 1 點先番到屋企   話好熱   之後沖埋個涼又瞓   其實滕來滕去又再瞓   嘥哂啲時間   一陣又要做公司嘢   攞嚟搞 ~

咁我就醃五花腩   見到塊皮有粒豬 lin   我覺得勁嘔心囉 ~

搞掂哂就整沙律   整完都 1 點半   咁 Send 比家姐睇   我話如果佢要就比佢   佢又話唔要   之後我打比佢   其實之前買咗大蘋果   都係想整比佢   不過我驚蘋果擺得耐唔好食啫 ~





咁我係都話比佢   佢終於要啦   我再加多罐椰果同粟米粒比佢   咁佢可以分兩餐食   一開罐椰果覺得啲色好怪   黃黃哋咁   再望個罐   原來 1 月到期   我成日覺得買咗無耐咋喎    好在我頭先整咗嗰啲係 8 月到期咋

見有時間   我再整埋麥芽糖餅乾比家姐   又順便幫我清下嘢   哈哈



搞掂哂再執下櫃桶   寫哂有啲咩罐頭糧食   今次的起心肝寫㗎   真係唔想買買埋埋又要掉   好鬼折墮 ~

搞掂哂就沖涼   之後就出門口喇   原來都已經 2 點 45 分了 ~   

家姐車麥包遊車河   話佢咁樣會好好瞓喎   好似人咁   哈哈

佢話上星期日帶咗麥包睇醫生   醫生話佢心臟發大   其他器官又開始縮細   所以驚佢無啦啦會暈   家姐講到眼濕濕   我話唔好植入式   家姐話佢都知   但要有心理預備   其實我嗰下都想喊啦   不過忍住   所以真係唔可以再養狗   唔想自己傷心 ~

同家姐周圍行下   佢差唔多 3 點 20 分就走人   咁即叫里奧大人幫我拎啲沙律落嚟比埋家姐   之後就去食下午茶喇 ~

里奧大人做公司嘢   我就仍然要執廚房   差唔多 5 點半就煲香茅薑茶   勁好飲呀   間唔中又煲下先 ~



6 點滖湯   7 點開始焗燒肉   但焗咗 15 分鐘都知失敗   我仲特登蒸隻鹹蛋做麻甩佬飯   點知無得做啦   嗚嗚 ~

我特登剪開啲皮   但真係焗極都唔脆㗎  哈哈

是日晚餐 - 韓汁焗五花腩 + 節瓜鹹蛋魷魚湯

韓汁焗五花腩 - 焗 15 分鐘   見啲皮都似唔脆囉   咁再焗半個鐘啦   啲皮都韌過我臉皮   所以即轉陣   諗起阿 mi 上次 BBQ 整韓式五花腩   仲好記得佢必開再燒   我有樣學樣   比着以前   如果明明想整一樣嘢   整唔到就即掉哂啲食材㗎   依家唔會喇   除非煮到爛哂啦 ~      

節瓜鹹蛋魷魚湯 - 終於清哂阿 mi 比我嘅魷魚乾了 ~

諗住假期可以早啲食飯   點知 8 點先食飯   食完洗埋碗就即沖涼喇   好攰 ~

里奧大人做公司嘢做到 10 點   估唔到佢都食沙律   佢知我特登整   佢實食   咁當然係佢鍾意食先食啦   唔鍾意食就會話飽囉   衰 ~

睇下電視   又唔係咁眼瞓   所以 12 點先瞓 ~