XO 醬炒腸粉 + 青紅蘿蔔粟米乾螺頭湯 ( 22-APR-2018 )

( 22-APR-2018  SUN )

里奧大人尋日話番早堂   鬧鐘響咗又話番午堂   已經第 2 次咁   其實倒不如索性番午堂   唔駛又翻瞓嘛 ~

10 點起身   沖埋涼就出發食早餐喇 ~



崇拜完畢就去超市買榴槤   咁我哋叫阿姐揀嘛   佢話都無咩邊個熟   之後里奧大人話唔熟就唔要 lu   阿姐即刻揀   呢啲服務態度真係好好   一話走就即刻揀比妳   哈哈 ~

叫里奧大人拎榴槤番屋企先   我就去街市買餸 ~

番到屋企都已經 2 點半   又要沖涼呀   行完街市好鬼熱   哈哈 ~

里奧大人就睇書   好難得前晚做哂公司嘢   我就上網睇嘢   好快又 4 點   係時候煲湯了 ~

喺街市買咗 1/4 西瓜   只係 $23   仲睇到佢啱啱切開個西瓜咋   感恩感恩   尋日睇到 1 杯西瓜汁要 $30  所以我叫里奧大人唔好飲   我打汁比佢飲好過 



賤奧又講咗啲嘢令我非常之唔開心   搞到我都無咩心機   狗口不出象牙   估唔到佢哋成家都係咁   賤人族 ~

今日無食下午茶   所以 6 點都開飯咯 ~

是日懶餐 - XO 醬炒腸粉 + 青紅蘿蔔粟米乾螺頭湯

XO 醬炒腸粉 - $7/10 條   但我買咗 5 條咋   真係食唔到 10 條咁多   就咁用 XO 醬炒啦   但完全無色水囉   所以明明上碟都要倒番落鑊   再加啲老抽   當堂靚仔哂   哈哈 ~

青紅蘿蔔粟米乾螺頭湯 - 最主要係想食埋啲乾螺頭   今次無落肉   味道都好清甜呀   好味道 ~

洗埋碗都 7 點 15 分   我自己去徑步呀   想靜下 ~

徑半個鐘就番屋企 lu   估唔到都出汗   我覺得今晚又熱又焗呢 ~

沖埋涼就食榴槤   都甜吖   其實依家食唔慣泰榴   不過無計啦   邊有咁多錢食貓山王喎   講緊七百幾蚊一個   咁我寧願去轉大陸小旅行咯 ~

有時見到 1 Pack 得 3 粒嘅榴槤都貴啦   個價錢咪一樣係連殼價   嘥氣

里奧大人食完榴槤即飲 100 Plus   我完全唔記得呢個配搭添   哈哈 ~

睇多陣電視   今晚 11 點幾都瞓 lu ~