豉油雞 (外賣) + 芥蘭 + 芫茜皮蛋魚片湯 ( 29-JUL-2018 )

( 29-JUL-2018  SUN )

感恩一覺瞓天光呀   鬧鐘 9 點 45 分響   但我 9 點 43 分起身去廁所   終於早過里奧大人起身   哈 ~

搞掂哂就去食早餐   依家有好多時間食早餐   因為我唔要咁趕頭趕命呢   我寧願早起身呀 ~

好鍾意個漱口盅   哈哈



呢個大衣夾又係好鬼正   





食完就番教會   崇拜完畢諗住行快啲   點知撞親隻腳   痛鬼到我要坐低抖呀   變相仲慢咗   哈哈 ~

我去買餸   里奧大人就約咗姑奶傾嘢   之後再去舖頭整嘢 ~

咁我買完餸都 2 點   飲包紙包奶茶同食 3 件杏仁酥   再抖陣就煲冬瓜袪濕水 ~

今日勁喇   出動全力抹嘢所有嘢   之前真係好攰   無哂動力做家務咁   但又成日知道自己無抹嘢   瞓唔着架真係   始終有嘢未做嘛   所以今日做哂大清潔   今晚應該有覺好瞓   哈哈 ~    

里奧大人 4 點幾番到嚟   叫佢即飲冬瓜水   佢就好緊張咁話:   係呀   要早啲飲   唔係成晚去廁所 ~

6 點開始滾湯   今晚非常之簡單   所以 7 點唔夠就可以開餐呢 ~

是日懶餐 - 豉油雞 (外賣) + 芥蘭 + 芫茜皮蛋魚片湯 

豉油雞 (外賣) - 呢排成日都好想食豉油雞   好奇怪 ~      

芥蘭 - 倒咗滾水喺鑊   但唔記得開火   奇怪點解啲芥蘭瞓喺度唔郁   咁好啦   再開火   因為我唔想食好腍嘅芥蘭   所以好快又熄火   但其實我唔記得淥咗幾耐   咁里奧大人一咬就話係咪未熟 ?!   我心諗係咪唔想食呀 ?!   之後我咬啦   真係未熟   又要再淥過   哈哈 ~

芫茜皮蛋魚片湯 - 係時候要飲番啖湯喇 ~

洗埋碗再開機洗衫   之後就大清潔廁所   勁攰呀 ~

唉   隻腳仲係痛添   好在唔係第日去旅行咋   唔係就慘了 ~

今晚 11 點唔夠都自己瞓先喇   依家一有睡意都即瞓   話知佢係 10 點半   哈哈 ~