港龍海鮮酒家 @ 鯉魚門 ( 14-OCT-2018 )

溏心皮蛋



酸薑橋頭



沙薑雞腳



拜山嘅坑腩   好味道呀



拜山嘅白切雞



避風塘瀨尿蝦 - 避風塘料唔香脆   但啖啖肉嘅瀨尿蝦就好味道喇



唔知咩斑   好味呀   真係啱啱好熟   



蒜蓉蒜貴花蚌 - 好爽口呀   正



我覺得好大隻



辣油煮花螺 - 份量都好多



果皮蒸鮑魚



我覺得好大隻㗎   因為食完之後都飽哂咁

鹽焗奄仔蟹 X 3 - 一上枱聞到好香呀   但唔記得咩味添

好多膏   所以食完好滯   哈哈



芥菜豆腐湯   佢仲講咗 1 種魚   不過我唔記得   呢個湯反而好有豆腐味喎   其實飲剩好多   勁想打包   不過好驚聽晚飲會好腥囉



芒果 + 木瓜



( 14-OCT-2018  SUN )

今朝里奧大人 8 點半起身番崇拜   佢之前又無講話番喎   同埋佢教錯鬧鐘時間呀   不過我無番呀   所以繼續瞓啦   急急趕趕咁番   我真係唔會囉 ~

我 9 點 15 分起身   食埋早餐就番學 ~



之後佢係都話同我講咗   我話是但啦   要是真係同我講咗   我又點會唔即刻彈起身呢 ?!   同埋點會唔預時間食早餐呢 ?!

主日學完畢就去海港飲茶   今日約咗家姐 姐夫同加拿大番嚟嘅叔叔嬸嬸一齊飲茶   之後拜山再食海鮮 ~

滷水豬腳仔 - 都幾入味   其實仲有食其他點心   不過我想傾偈   所以無逐樣影了 



呢個雪山叉燒包好真材實料   食完半個已經好飽

櫻花蝦薄撐 - 好味喎   同埋脆邊好味道呀   



豉椒排骨炒河



今次叔叔突然番香港   其實係嬸嬸屋企人有啲唔好消息   所以先突然番香港 ~

佢哋上星期日晚即 Book 機票   最快都要星期四晚到香港   咁我哋都唔約佢哋住喇   等佢哋搞掂哂佢哋啲嘢先囉   之後嬸嬸打比家姐話約我哋今日拜山   咁無問題吖 ~

但其實今日係家姐生日   上個月已經約定好今日去佢屋企食飯   叫埋佢前工人嚟一齊食   但咁啱佢依家嘅工人今日唔得閒   咁取消啦   一個人煮唔到咁多嘢嘛 ~

12 點半左右開始飲茶   都唔記得飲到幾點就出發去拜山 lu ~

飲完茶就去拜山   今次我勁喇   只係喊咗幾嘢   可能平時都有喊   所以今日唔會喊得咁勁   哈哈 ~

今日來回程都無咩人喎   可能啲人留番正日先來 ~

搞掂哂都係 3 點幾   咁去大本型飲嘢同坐下 ~

咁我同家姐去買嘢飲   咁買咗 5 杯嘢飲   所以里奧大人就出嚟幫手拎   拎拎下話個托盤唔知震定咩   叫我哋幫手拎番杯   我同家姐咪話囉   要是我同家姐每人拎番 2 杯   咁你不如唔好出來幫手   真係衰過唔幫   哈哈 ~

話咁快又 5 點   同嬸嬸買完書就去鯉魚門行下喇 ~

好有遊客區 Feel


鯉魚門有間賣豬肉乾嘅好好味   即燒即包   比我哋試食嘅又大大塊   我哋總共買咗 2 磅蜜味豬肉乾 + 琥珀合桃 ($40/半磅) + 新嘢 ($20)   之後佢又送多包新嘢比我哋呀 ~

@ 年香園



送比我哋嘅 "新嘢"   脆卜卜好味呀   有味道但唔鹹   唔識形容添

佢哋應該喺度揀海鮮   我問家姐妳識揀咩 ?!   佢話睇個樣新鮮就得喎

淺色隻龍蝦殼好靚呀





里奧大人影㗎   我初初以為係佢哋揀嗰啲添



係咪想影隻蟹好大隻呀 ?!



食下傾下又到 7 點半   係時候走人喇 ~

家姐就打的番屋企   本來我哋都話請叔叔打的番屋企   佢哋又唔制   咁我哋一齊行去油塘地鐵站啦   夜媽媽唔好叫我認路   所以里奧大人開 GPS   不過最後我哋係跟住叔叔行   佢認路真係好過我哋呀   哈哈 ~

番到屋企都即沖涼   再整依樣嗰樣   又 10 點幾 ~

睇多陣電視   11 點幾先瞓 ~