霸王山莊 @ 尖沙咀 ( 3-OCT-2018 )

小籠包 ($42) - 都幾多肉汁   唔錯唔錯



東華門千層蔥油餅 ($40) - 睇個樣白雪雪   但原來超勁好味   個皮好鬆化㗎



四川回鍋肉 - 好味呀   里奧大人都話呢間好味過金滿庭呀   因為金滿庭嘅回鍋肉同上海粗炒係同一個味道   蔥爆牛肉又係咁   簡單講句   碟碟一樣味道咁囉



上海粗炒 - 里奧大人指定要食   佢真係超級鍾意食呢

( 3-OCT-2018  WED )

今朝瞓到 9 點 45 分都醒咗 lu   梳洗之後就去超市買生果   買完再去食早餐呢 ~



食完就番屋企抖下   唔知點解好攰喎   已經飲完咖啡喇喎   奇怪 ~

番到屋企即做功課啦   今次好有心機做呀   但衰奧係都要打擊我   不過我又係衰嘅   明明寫住係 1 - 24 節   我都可以寫最尾係 23 節   哈哈 ~

做完功課就睇電視喇   唔知做乜鬼好餓咁   所以 1 點 45 分都開始煮嘢食  煮番尋晚嘅蕃茄薯仔湯飯   好在睇下個火啫   煲底已經黐住哂啲飯   嘥哂呀   嗚嗚 ~

我覺得自己好似食意大利飯咁

諗住簡單煮滾啲湯飯就無咩嘢洗   點知煲燶咗要擦餐死   激鬼氣呀 ~

沖埋涼就休息   睇 Youtube 睇到勁想瞓覺   但都已經 3 點 50 分   差唔多要出門口啦 ~

約咗醫生 5 點 15 分   無諗過咁塞車   好在 5 點 05 分都到診所 ~

唉   醫生話我食新藥效果唔理想   叫我停   但好奇怪囉   上次我話唔舒服   佢又叫我堅持要食   同上次答案完全唔同嘅   依家食咗 2 個月之嘛   佢叫我食多 1 個月   不過我都打算食半年至 1 年囉 ~

咁我比錢嘅時候   姑娘同我傾一陣偈   佢都叫我食半年呀   同埋佢話頭先見我入嚟嘅時候   以為我好唔舒服   因為個咀唇係無血色   哈哈   其實我初初諗住搽番啲唇膏㗎   但我要比醫生見到我貧血嘛   不過醫生話都知我貧血喎   上次唔聽佢咁講嘅 ~

拎埋藥就 Send 短訊比里奧大人啦   講話咁咁咁囉   之後佢覆我話 "妳一定有喊啦"   我話我無喊喎   仍都唔擔心   求神醫治   但就有唔開心囉 ~

睇完約佢喺南記方向等   佢成日問我到未 ?!   我話行緊喎   又要搵路   你知我方向感幾勁先得㗎   哈哈 ~

我話一定唔食南記同酸辣米線囉   咁揀霸王山莊啦   坐得舒服啲 ~

食到 7 點幾就搭車番屋企   抖陣就沖涼喇 ~

今晚到里奧大人做功課   我就熨衫熨床單   依家我勁唔慣熨嘢呀   哈哈 ~

勁喇   可能今日都頻樸   所以 10 點 40 分都瞓覺 lu   勁眼瞓 ~