煎釀三色椒 + 蒜芹炒腸粉 ( 13-JAN-2021 )

( 13-JAN-2021  WED )

尋晚瞓到半夜熱醒   係條頸有啲汗   所以要起身抹乾淨 ~

今朝同里奧大人講話尋晚好熱呀   佢話唔覺   仲話我潮熱   笑死我呀   又唔知咩叫潮熱又學人講   一陣同同事講話佢老婆潮熱   人哋都唔知比咩反應好呀   哈哈哈哈 ~

天氣凍   真係起身都慢過人   之前鬧鐘一響就直入廁所刷牙沖涼   依家就慢吞吞   沖埋涼都已經 7 點 40 分   其實我朝早只係沖頭沖身   基本上好快   最耐只係吹頭 ~

早餐食奶醬多   因為晏晝要食飽啲 ~

菇場唔太忙   所以越坐越凍 ~

Lunch Time 出去買酸辣米線   菇場凍到不得了   我要食熱嘢取暖呀 ~

今次小辣就 OK 喇   咁 8 卦朝早會問我 Lunch 食咩   我一話米線   佢就話妳記得上次發生咩事啦啦 ?!   哈哈   因為上次中辣真係食到全日胃痛   諗起都驚

無啦啦超級忙   同埋覺得超級凍   我雙手已經係咁打字   但手指都係僵硬   8 卦話今日冷氣又 Shot 咗   佢個位又係超級凍呀 ~

放工先有麻煩嘢做   好在好快搞掂 ~

去到街市   里奧大人話放工   咁我都唔駛咁趕喇 ~  

買完餸再去買啲凍肉   之後去超市買甜醬   但居然無   又要去番街市買   唉   已經好鬼重   仲要行來行去   嗚嗚 ~

一開門見到里奧大人   佢個樣好驚咁   話我做咩咁耐先番到屋企嘅 ?!   佢以為我又暈呀   我話番轉頭買甜醬囉 ~

原來已經 6 點半   唔怪得佢話咁晏啦   平時真係好少會咁晏呢 ~

今晚唔沖涼喇   直接煮飯   咁先可以 7 點半先開餐 ~

是日晚餐 - 煎釀三色椒 + 蒜芹炒腸粉

煎釀三色椒 - 買咗 $30 墨魚滑   釀起上來就啱啱好   里奧大人話份量咁多嘅   我話以前都係咁㗎喎   之後醒起   因為我以前帶飯   所以唔駛一次食哂 ~

蒜芹炒腸粉 - 因為里奧大人想 WFH 嘅時候   午餐食腸粉   咁我去買啦   十條只係 $15   今晚食五條   另外十條比里奧大人分兩餐食   真係超級抵食   哈哈   尋晚半夜醒咗   突然醒起無甜醬   所以今晚一定要買啦   食腸粉嘅靈魂係甜醬辣醬嘛 ~

大清潔廚房   真係同煮嘅時間一樣   搞掂哂就沖涼喇 ~

里奧大人 8 點 45 分開會   咁我就睇靈修   等到里奧大人開完會為止 ~

10 點終於開完會   即睇 "夫妻的世界"   哈哈 ~

今晚睇咗 1 集咋   但已經 11 點半   所以都係瞓覺   同埋今晚都好攰下   都無本事睇多集呀 ~