蠔油燜冬菇支竹鴨掌 + 翡翠苗 ( 25-JAN-2021 )

( 25-JAN-2021  MON )

估唔到今朝里奧大人又陪我食早餐   佢話因為 11 點半都去剪頭髮   所以陪我食早餐喎 ~

食完就開機洗衫   感覺好似唔駛番工咁   哈哈 ~

菇場唔太忙   做完 Report 就可以抖下 ~

Lunch Time 行一田   隔兩行都聽見爽把聲   真係慘過見鬼   最怕啲人講嘢咁大聲 ~

我見到小寧波湯丸開箱   問職員拎兩盒黑芝麻湯丸就走人   但睇包裝係寫麻蓉湯丸   咁我再行去凍櫃睇睇   咁啱見到船頭同阿花   我話要黑芝麻味道   佢比咗麻蓉味   我哋認知嘅麻蓉係淺啡色嘛   之後再睇價錢牌係寫住麻蓉 (黑芝麻)   但包裝盒面只寫麻蓉   咁真係好易令人誤會噃   因為我喺百佳見到麻蓉有好多盒   但又寫住黑芝麻味道係無貨   咁即係其實大把貨啦 ~

其實一田貴百佳幾蚊   但我話難得開箱   所以先買咋   哈哈 ~

買完都唔係咁餓   所以番菇場食 Flakes + 乳酪算喇 ~

仍然唔忙   又係 Skype 到放工   其實我以前唔識速成   仍都好驚打中文   依家真係打得好快   里奧大人同家姐仲成日問我啲字點打添呀   好有成功感㗎   哈哈 ~

放工即走   沖埋涼就預備晚餐 ~

諗住就咁蒸熱啲餸   但都要差唔多 7 點先開餐 ~

是日懶餐 - 蠔油燜冬菇支竹鴨掌 + 翡翠苗

蠔油燜冬菇支竹鴨掌 - 呢個餸尋晚燜定   今晚食真係非常入味   我用家姐比我嘅日本冬菇   真係好正   又大又厚肉   鴨掌就買六隻只係 $8   我同家姐講話買咗鴨掌   佢即刻話叫佢整咪得囉   不過我話我都想試下整   但一定唔買超大嗰啲   因為真係好恐怕   成隻手咁   哈哈 ~

翡翠苗 - 終於清哂   呢幾盒好多渣   之前買嘅唔係咁架   激死我   真係唔好貪平咯 ~

洗埋碗就拖地   之後再沖沖身 ~

食埋蘋果都差唔多 8 點 15 分   即刻睇驚奇的傳聞喇 ~

其實 9 點半想瞓   但無啦啦劇情又好緊張   最後睇到 10 點半都停   因為我好眼瞓   哈哈 ~