午餐肉辛辣麵 + 小旺菜 ( 12-SEP-2021 )

尋晚食剩辣菜甫   咁唔好浪費啦   煮半個拉麵同埋啲年糕一齊炒   勁好味   但真係好鬼辣

( 12-SEP-2021  SUN )

今朝 7 點 40 分起身都唔想再瞓   所以即去徑步 ~

買埋早餐就番屋企   食完抖陣就做小清潔 ~

搞掂哂都 9 點幾   之後即大清潔廁所   沖埋涼就出發去里奧大人公司幫手 ~

鴛鴦媽見到我話我瘦咗   我話係呀   因為做運動呢   同埋之前真係脹爆得滯   手指關節都痛呀   我覺得係一個警號   但做咗運動之後真係無痛喎   所以我先咁堅持囉 ~

我最開心係啲衫同裙可以着得番   之前里奧大人成日話我買完又唔着   我話唔係唔想着   但係着唔到囉   哈哈哈哈 ~

崇拜完畢就走人   等埋里奧大人放工   已經 2 點半   唔怪得有啲餓啦 ~

食完都即刻搭車番屋企   頭先家姐又買咗 HD 雪糕批   引到我又要去買 6 件   不過都可以食半年   其實我又唔係話好鍾意食雪糕   但見咁平就想買囉 ~

沖埋涼真係休息   可能今日好焗熱呀   個人有啲攰 ~

里奧大人瞓晏覺    我睇睇下 Youtube 都瞓鬼埋   哈哈 ~

瞓到 6 點左右都醒 lu   咁要預備晚餐喇 ~

是日懶餐 - 午餐肉辛辣麵 + 小旺菜

午餐肉辛辣麵 - 我覺得高雲牌午餐肉真係唔錯   唔油又唔鹹   最正係就咁淥熟都好好味呢 ~

小旺菜 - 終於食埋呢半個   下次都唔會特登買多棵菜   成日記住要食好煩呀   哈哈 ~

洗埋碗就去徑步   完全無風   不過點都要行半個鐘㗎喇   晚餐太 Heavy 呢 ~

沖埋涼就睇戲   今晚睇 "怪物" ~

正想睇嘅時候   阿妹 Whatsapp 話我今日著得好靚   之後話顯得我又高又瘦   我話誇張啦   可能我着咗黑色褲啫   不過呢星期都瘦咗 3 磅   可能天氣熱   一做運動就勁爆汗 ~

今晚 11 點瞓覺   難得有睡意呀 ~