泡菜牛仔骨 + 菜心苗 + 自家制麵包 ( 16-SEP-2021 )

( 16-SEP-2021  THU )

感恩又一覺瞓天光   6 點 15 分醒醒地   不過再瞓   之後里奧大人摸我塊臉幾下   我覺得好奇怪   因為我發惡夢大叫   佢先會咁   如果唔係佢唔會整醒我呢 ~

6 點 45 分起身   今朝涼咗啲啲   徑步無咁辛苦 ~

番到屋企   里奧大人話我發惡夢大叫呀   之後諗諗下   我發夢有人玩電動車落扶手電梯   我大叫家姐扶穩   因為個人差啲推跌家姐呀   所以先大叫呢 ~

早餐食芝士腸仔包   又幾好味 ~

菇場唔忙   又做 Filing   好想快啲清哂啲 Filing 呀 ~

Lunch Time 出去一田同韓印紅買嘢   之後好想食牛腩河呀   所以即去買 ~

我要多蔥扣底   做咩同我走蔥呀   嗚嗚

   

阿齋話我好耐無食牛腩河   因為我以前坐另一個位   佢話幾乎日日都聞到牛腩味   又話我食嘢係一期期   一係咖哩魚蛋   一係炒麵   一係酸辣米線咁   哈哈   不過我真係咁   所以次次好鍾意食嘅嘢   會變得好快唔鍾意食   哈哈 ~

忙下停下又做下 Filing   所以好快又放工 lu ~

里奧大人話今晚遲啲放工   咁我番屋企放低啲嘢都去徑步喇 ~

慢慢行半個鐘都流到成身汗   真係焗到不得了 ~

番到屋企就收到里奧大人電話話放工   咁要即刻預備晚餐喇 ~

是日晚餐 - 泡菜牛仔骨 + 菜心苗 + 自家制麵包

泡菜牛仔骨 - 有洋蔥+迷你秀珍菇   之後再加啲泡菜一齊煮   我覺得何汁送麵都好正呀 ~

菜心苗 - 又買 1 pack   份量唔多就最好 ~

自家制麵包 - 我鍾意食松子仁㗎   所以覺得好好味   哈哈 ~

洗埋碗就開機洗衫   出完涼就休息 ~

9 點半睇劇   但里奧大人睇到 10 點半話瞓覺   咁就好喇   因為我正想話瞓覺   始終我早起身   唔想太夜瞓呢 ~