煎蘿蔔糕 + 冬菇旺菜 ( 1-FEB-2022 )

家姐買比我嘅多多曲奇 & 開心果

仍都係家姐買比我嘅芋蝦 & 角仔 & 牛耳 & 鹹蛋散

( 1-FEB-2022  TUE )

今朝同里奧大人一齊番工   不過好多餐廳都無開   所以買埋早餐番公司食呢 ~

好耐無食早晨全餐喇

11 點幾可以放工   但我哋一陣去婆婆屋企拜年   咁喺公司食埋午餐先去喇 ~

燒肉得肥膏咁滯   以後唔會幫襯佢呀  太過份呢

食完就去婆婆屋企   家姐同剪髮表妹就食完午餐先上去 ~

估唔到大舅父一家已經到咗   仲齊哂人添   平時佢地多數 3 點幾到嘛   之後表妹夫話今次無得食飯   所以就早啲到呢 ~

之後舅母捉住我同大食表妹傾偈   舅母已經信主   其實我同大食都估唔到   因為舅父應該唔鍾意   不過信仰嘅嘢   真係唔到你話事呢 ~

舅母都話 8 年前已經識呢班信主朋友   但從來無迫佢信主   但舅母話喺佢地當中真係得到愛同關心   所以好感恩舅母信主   感受到真正嘅平安喜樂 ~

我都覺得信仰無得迫   爸爸走咗呢段期間   我係跟朋友番緊教會   但佢話唔可以裝香比爸爸   所以我無再番教會 ~

咁里奧大人屋企人信主   又係成日叫我去聽報道會   我同里奧大人講   我覺得好煩呀   唔好再成日叫我去聽   我信就會自然信   所以佢地再無叫我去呢樣嗰樣 ~

我唔會因為自己老公信主而信主   感恩我信主當中   真係感受到神對我嘅愛   否則都應該見唔到我㗎喇   哈哈 ~

之後舅母又問我係咪好鍾意行山 ?!   我話唔算喺山啦   佢話有次同表妹行山   一行就行咗 5 個鐘   仲要無咩點飲水   因為無得去廁所   佢話行山係想望下山同望下樹木咁   無諗過咁辛苦   我話同我一樣啦   真係遊山玩水唔快得   哈哈 ~

因為表妹要走先   所以佢地全家都走喇   原來都傾咗成個鐘 ~

咁繼續同剪髮表妹傾偈啦   真係兩年無見喇   感恩今次里奧大人肯陪我同婆婆拜年呀 ~

傾開瞓覺時間   我同家姐一樣   如果去旅行要半夜 4 點起身無問題   但平時半夜 4 點瞓就唔得   同埋我以前唔夠瞓就鬼剃頭   所以好驚囉 ~

差唔多 3 點幾都走喇   家姐同剪髮表妹行 AEON   我就番屋企喇   因為都比較攰 ~

番到屋企即沖涼   之後休息休息 ~

我同里奧大人講話家姐比咗封利是我哋   之後我數錢啦   我話家姐比咗好多錢呀   里奧大人見到都 O 哂咀   話留番唔好用   下次比番家姐   我話呢封係我生日利是喎   哈哈哈哈   里奧大人反哂白眼   話講嘢無頭無尾 ~

$16 蕃薯乾   好煙韌呀

剪髮表妹送比我嘅賀年禮物

一年出一次嘅全盒   其實搵自己來搞   因為影完相又要放番哂啲糖果入保鮮袋   哈哈

我同家姐講話咁多有排食   佢叫我慢慢食   哈哈哈哈   其實我諗住佢下句會話下次唔比咁多㗎

今晚煎糕   真係好驚   今晚都係 7 點左右開餐呢 ~

是日晚餐 - 煎蘿蔔糕 + 冬菇旺菜 

煎蘿蔔糕 - 今晚用五層鑊煎   但都唔覺煎咗囉   我已經無心急反轉啦   唉   煎糕真係對我有好大打擊   哈哈 ~

冬菇旺菜 - 尋晚特登留定啲冬菇   今晚唔駛齋食旺菜咁悶 ~

洗埋碗又要大清潔廚房   所以唔係咁鍾意煎嘢 ~

沖完涼抖陣   之後睇 "大力女子都奉順"   睇到 12 點先瞓呢 ~