粟米龍脷柳 + 薑蓉炒豆苗 ( 13-FEB-2022 )

( 13-FEB-2022  SUN )

今朝 9 點半自然醒   係個頭無啦啦有啲痛   之後醒咗   所以我真係唔可以瞓太多   除非唔舒服   哈哈 ~

食埋早餐就拖地   之後就網上崇拜   完整都已經 1 點幾了 ~

里奧大人 2 點番到屋企   我話食廚餘   哈哈 ~

星期五晚食剩嘅飯餸   再加個泡菜拉麵   依家里奧大人用呢啲湯送白飯呀   仲特登拎隻細匙更 "北" 嚟食   話韓國係咁食法   真係笑死啦   好在我唔係睇印度片   唔係佢用手食飯就不得了   哈哈

食完又休息下啦   里奧大人 4 點左右瞓覺   我又瞓唔到   所以睇 Youtube 算喇 ~

唉   個頭仲係有啲痛   所以都係食 Panadol   好耐以前   個頭勁痛   仲痛咗一日   最後差唔多瞓嘅時候食粒 Panadol   之後好快就唔痛   我覺得自己無啦啦痛咗一日好唔抵呀   做咩唔即刻食呀   哈哈 ~

里奧大人好忙咁   佢話公司要買 Len 線   我即話屋企有無呀 ?!   佢秒答話屋企有唔駛買   我笑出來   我話我想講   如果屋企有多就拎番公司用呀   佢話估我唔到講呢句   因為平時我咩都話買 ~

仲話依家佢估唔到我想講啲咩   因為上次新年要佢比多啲家用   因為我要雙糧   佢話其實啲家用都係妳自己儲嘅啫   我秒答話係   佢都話估唔到我會認   咁係咪係囉   做咩唔認喎   呵呵 ~

6 點幾預備晚餐   所以 7 點左右可以開餐喇 ~

是日晚餐 - 粟米龍脷柳 + 薑蓉炒豆苗

粟米龍脷柳 - 唔想又齋食龍脷柳咁悶   所以即開罐粟米蓉喇   里奧大人話好味   但就覺得個汁太杰   無咁杰會好味啲   其實我知自己狀態唔好   我好驚整得太稀又無味   所以我寧願杰少少呢 ~

薑蓉炒豆苗 - 終於清埋呢份豆苗   淥熟之後加薑蓉炒下   因為我係唔會炒菜   哈哈   同埋好在今晚清埋咋   因為啲菜都開始變黃了 ~

洗埋碗就沖涼   之後睇 Youtube   接近 12 點先瞓 ~