涼瓜炆排骨 + 魚香茄子雞粒煲 (外賣) ( 12-SEP-2023 )

涼瓜炆排骨 - 呢個好味   如果自己整到咁好味就好   哈哈 

魚香茄子雞粒煲 - 我覺得用雞粒好過用免治豬肉   因為無咁肥   下次我又整下先

( 12-SEP-2023  TUE )

感恩一覺瞓天光呀   又係鬧鐘未響都醒咗 ~

早餐仍然食糙米芝士包   里奧大人今朝番晏少少   所以都一次過焗熱埋去喇 ~

今朝諗住早啲番菇場   點知困 Lift   明明仲有 3 層就到我哋   點知顯示層數嘅燈制突然間無哂   仲自動落到地下   好在同 lift 嘅兩個男人發現咋   因為我聽緊歌   見佢哋係咁望住上面   我先知原來架 lift 壞咗 ~

菇場 3D   可以快快手做自己嘢 ~

Lunch Time 出去行陣   之後買手打牛丸就即番菇場   因為開始落雨喇 ~

唔忙就好喇   因為個人又係攰攰哋呢 ~

放工即走   點知去到一半就壞車   好在等 4 分鐘就可以過車   個司機好好人   幫我哋安全過車   因為我哋架車停咗喺中線呀 ~

今日咩事呀   番工壞 Lift 放工壞車 ~

本身 6 點睇醫生   變咗要遲到少少添 ~

差唔多 6 點 15 分就到我   醫生話咩軟組織問題   同埋我膝頭哥又腫咗似發炎   叫我唔好行咁多   唉   希望食藥之後好番啦 ~

今晚里奧大人要開夜   本來我買外賣   因為我遲咗   所以要佢買外賣番公司度食呢 ~

我食完都番屋企喇   之後做下小清潔再開機洗衫   沖埋涼都休息 lu ~

里奧大人 9 點幾就番到屋企   估唔到仲有蛋糕食   開心開心 ~

又係 CHATERAISE   

千層蛋糕

咁里奧大人話講樣恐怖嘢我知   我叫佢即刻講啦   但佢話沖完涼先講   我話要講好耐㗎 ?!   佢係都唔答我   我心諗唔通屋企有鬼 ?!   定佢公司有鬼呢 ?!

之後佢沖完涼就講啦   話尋晚發夢我死咗   但佢語氣真係好唔想講出嚟咁㗎 (唔通真係好怕我死 ?!)   咁仲見到佢阿媽   話佢阿媽要掉哂我啲嘢   但佢話唔掉得呀   呢啲係我最鍾意㗎   所以唔會掉 ~

不過我都真係好認真同佢講過   如果我死咗   首先要將我啲器官捐哂出去   其他身外物就睇下家姐要唔要   第二就係喪禮要簡單   千奇唔好用咁多錢   將啲錢留番自己用好過   第三就係唔好幫我買位   喺心中好好紀念我就可以了   第四就係每年都要問候下家姐   睇佢手機電腦有無壞   一定要幫佢買同整㗎   做齊呢四樣我就安心喇   哈哈 ~

睇多陣 Youtube   今晚又係 11 點瞓 ~