辣汁焗雞蛋雞肶 + 蛋花粟米湯 ( 8-SEP-2023 )

( 8-SEP-2023  FRI )

尋晚又係 3 點幾去廁所   但都感恩好快瞓得番 ~

今朝開完焗爐   正想去刷牙嘅時候   里奧大人話同事 Whatsapp 依家黑雨   咁即開電視睇啦   宣佈黑雨直至中午   咁肯定上午唔駛番   所以我想瞓多陣呀 ~

不過最後都係瞓唔到   8 點都起身 lu ~

早餐食芝士甜餐包   真係好在買定麵包咋 ~

一路食一路睇新聞   原來尋晚 9 點幾發出紅雨警告   之後 11 點幾開始黑雨警告   我只知道大雨   但無諗過係黑雨呢 ~

咁再睇清楚   原來依家係發出 "極端情況" 警示   睇見地鐵站同商場入哂水   街道好似沼澤咁   真係喺香港生活咁多年   都未見過咁情況   連加拿大嬸嬸都問我哋情況點呀 ~

差唔多 10 點半   里奧大人話要番公司處理 Urgent 嘢   咁我都拿拿聲沖涼   一齊去幫手啦   但就帶埋背囊   因為可能一陣我都要番工 ~

11 點幾政府宣佈極端情況至少維持到下午 6 點   咁我可以全情投入幫里奧大人 lu ~

可能行來行去關係   我真係 12 點已經開始餓   但整下呢樣嗰樣   差唔多 12 點半先食午餐 ~

里奧大人話杯麵 9 月 16 日到期   咁一齊食埋去喇

我其實唔要豬肉乾都得   我食杯麵真係無餸都可以   我做女時   食出前一丁真係齋麵一個㗎咋   因為煮呢啲麵係要方便   同埋屋企真係無丸類   媽咪多數買新鮮嘢嘛   好少買急凍食物   之後結咗婚   里奧大人話食出前一丁要有餸   即係腸同餐肉呢啲

食完抖陣又開工   3 點 45 分改發黃雨   但都唔駛番工㗎喇   因為極端情況係同掛 8 號風球嘅處理係一樣呢 ~

雖然無哂任何警示   但根本都番唔到工   街道真係滿目瘡痍   有啲直頭係地面凹陷   輕微嘅就水深及膝   我見到有啲係水深及腰添呀   真係好恐怖 ~

做到 4 點半都走人喇   番到屋企即沖涼休息下 ~

里奧大人就瞓陣覺   不過我 5 點幾都開始好眼瞓   所以都瞓咗 20 分鐘 ~

今晚要快快預備晚餐   但差唔多 6 點 45 分先食得呀   因為里奧大人一陣要上堂   所以好趕呀 ~

是日晚餐 - 辣汁焗雞蛋雞肶 + 蛋花粟米湯

辣汁焗雞蛋雞肶 - 尋晚食剩㗎   但就加多 2 隻蛋囉   咁樣睇落無咁悶   哈哈 ~

蛋花粟米湯 - 好耐無飲粟米湯   乜 S & W 嘅粟米粒少咗咁多嘅 ~

洗埋碗即開機洗衫   之後沖涼休息 ~

呢隻 Jagabee 好味呀

但份量多啲就好啦   哈哈

睇陣 Youtube   10 點開始靈修一個鐘   再同里奧大人傾陣偈   差唔多 11 點半先瞓 ~