焗海鮮卷 + 金菇拚學斗 ( 20-SEP-2023 )

( 20-SEP-2023  WED )

尋晚去完廁所   之後好快瞓番   但瞓瞓下又覺得好熱醒咗   不過 6 點 15 分咁早又唔想起身住   好在最後都瞓到 7 點 25 分呢 ~

早餐食芝士牛角包   係前晚晚餐食剩嘅牛角包   估唔到焗完仲好食過堂食   哈哈   瑞士卷都要食埋啦   雪櫃成日都好凍   再唔食變冰㗎喇 ~

菇場忙下停下   今日都回復狀態   開心開心 ~

Lunch Time 出去行陣   今日好想行街呀   諗住去 DAISO 睇嘢   但最後無啦啦去咗一田買咗 2 盒無花果   比完錢之後又好想買盒比家姐   之後再問佢今晚有無約人 ?!   佢好愕然話點解咁問 ?!   我話想買盒無花果比妳呀   佢話今晚約咗大媽拎冰皮月餅   咁我話啱哂啦   今晚喺地鐵交收 ~

真係好日唔約佢   一約佢咁啱又有嘢比我 ~

番到菇場已經 12 點半   要快快趣食盒腸粉喇   因為放低嘢同抹下枱都已經 12 點 40 分呢 ~

忙下停下   今日時間過得好快咁 ~

放工去韓印紅買嘢   之後即番屋企喇 ~

呢排開始派月餅比管理員   硬係想派嗰個又唔見   今晚終於比我見到佢喇   我叫佢喺房度等我   我想比月餅佢呀 ~

番到屋企都即預備晚餐喇   不過今晚只係焗同淥   非常簡單呢 ~

阿花話依家當造   所以真係好感恩今日去咗一田 

 

2 盒當中   得呢幾粒係青 BB 未熟   

買比里奧大人食㗎   佢勁開心呀   佢話今晚要食   我話等你無餸得白飯先好開嚟食   哈哈

都係買比里奧大人番公司食   有時落雨或者無帶飯   咁我都會叫佢食杯麵   咁唔駛下下落去買咁煩嘛

是日懶餐 - 焗海鮮卷 + 金菇拚學斗

焗海鮮卷 - 清埋 5 條海鮮卷   再加埋尋晚食剩嘅韭菜餅同蓮藕餅   感覺好豐富咁   雖然係無益嘢   哈哈 ~

金菇拚學斗 - 韓印紅嘅韓國金菇特價 $12/3 包   咁抵當然要買啦   再加埋半斤學斗   夠哂蔬菜啦   哈哈 ~

洗埋碗就抖下先   因為我約咗家姐 8 點幾喺地鐵站交收呀 ~

喺韓印紅買咗包年糕   不過冰格無咩位置   所以將佢入盒   咁又整齊好多咁呢

之前喺 AEON 買嘅煙燻芝士   比咗半包家姐   佢覺得好食就再買比佢

交收完又傾陣啦   最搞笑佢仲想繼續傾   我話唔傾啦   叫佢快啲番屋企 ~

我真係覺得好多時同家姐係有心靈相通嘅感覺   我今日都係無啦啦去咗一田睇嘢   咁啱家姐今晚又去拎月餅  ~

番到屋企都 9 點幾   要即刻開機洗衫喇   搞掂就沖涼 ~

美珍香嘅金錢豬肉乾 & 榴槤鮮生嘅榴槤冰皮月餅   里奧大人有口福啦

同家姐傾陣偈   之後叫佢快啲食無花果   因為如果佢都覺得甜   我下次再買比佢嘛 ~

佢影咗盒無花果比我睇   我特登比盒熟啲   咁佢可以快啲食   哈哈    

又睇陣 Youtube   今晚 11 點先瞓呀 ~