壽司郎 @ 紅磡 ( 31-DEC-2024 )

特大虎蝦天婦羅卷 ($27)

三文魚牛油果卷 ($22)

青瓜大粒過牛油果

吞拿魚 (迷你版) ($17) 

安糠魚肝軍艦 ($17)

日本產帆立貝 (迷你版) ($17) X 2

飛魚籽軍艦 ($12) - 里奧大人無啦啦問我鍾意食係因為味道定口感 ?!   我話係口感   因為其實都幾腥家嘛   哈哈

蝦三味 ($17)

鮮蝦天婦羅 ($12) X 2

里奧大人再食多碟特大虎蝦天婦羅卷   我話蝦肉壓到變咗心型好搞笑

( 31-DEC-2024  TUE )

感恩又一覺瞓天光呀   不過臨醒之前發咗好多夢   好在唔係惡夢咋 ~

今日係 2024 年最後一日   所以要同里奧大人出去食早餐   哈哈 ~

好厚嘅芝士

趕唔切班車   咁食完就去里奧大人公司坐陣先番工 ~

菇場唔忙呀   10 點收到公司群組訊息   今日放 4 點   真係超級開心呀 ~

2024 年完美結束

Lunch Time 都唔出去喇   喺 Pantry 同船頭傾下偈   之後先食 Flakes + 豆奶 ~

終於清哂 1 月嘅 Flasks + 豆奶喇   半年後再見

好快又到 4 點   個個準時放工 ~

阿花同我一齊行   佢成日話跟我番屋企   我話跟囉   請埋妳去我屋企都無問題㗎   不過我會等妳入咗屋就鎖門即走   等妳自己一個喺屋企   佢話我好恐怖呀   哈哈 ~

咁 4 點幾又未餓   所以去里奧大人公司坐陣先   咁啱佢要開會   不過都係等咗 10 分鐘就開完 lu ~

同里奧大人去壽司亭   本來想去另一間居酒屋   但里奧大人話難得咁早   壽司亭應該唔駛等位   居酒屋就下次正常時間放工去都得   咁又講得啱噃 ~

經過菜檔就買咗 1 斤菜   里奧大人話做咩唔食完先買 ?!   我話唔想成日記住要買呀 ~

今晚 5 點 15 分就食晚餐   咁又好呀   因為我都開始肚餓   呵呵 ~

食完就行 AEON   順便幫 CC 睇嘢   諗住去超市買生果   但大排長龍比錢就即走 lu ~

呢度次次都整到好靚

去成興隆買急凍豚肉   不過無哂貨   咁買大鵝掌啦   之後再買牛油同蛋糕就搞掂   最後去埋大孖買辣腐乳就番屋企   里奧大人就要番公司同大餅傾嘢 ~

開埋機洗衫就沖涼休息   里奧大人啱啱番到屋企 ~

北海道芝士蛋糕 (特級朱古力) ($46) - 里奧大人話見到好靚咁   所以買嚟試下

法國迷你海鹽牛油 ($33) - 我次次買牛油都擺到過期   因為懶得切開一粒粒   所以見到呢盒就即買喇

大孖醬園辣腐乳   唔記得幾錢添

里奧大人公司嘅聖誕交換禮物

等埋佢沖完涼就睇 "壞蛋獎門人 4"   一路食蛋糕一路睇真係好正   哈哈 ~

 

個盒就大   但原來好細件

咁樣睇好似好硬咁

其實好易切開   同埋我只係用匙更仔切開咋   里奧大人話好味道呀   咁我話下次再買啦

雖然今日係除夕   但唔會倒數㗎喇   所以 10 點 45 分都瞓覺 lu ~

咖哩雞拚司華力腸 + 滷水牛展拚雞翼 + 辣菜甫油麥菜 ( 30-DEC-2024 )

( 30-DEC-2024  MON )

感恩一覺瞓天光呀   不過依家天氣凍   有時醒咗都唔係咁想出被竇呀 ~

早餐食金文不芝士迷你酥   尋日喺 A1 見到 $26/6 件都抵   所以買咗 4 件芝士迷你酥同 2 件咖啡朱古力味麻糬波波球喇 ~

依家啲人應該去哂旅行   因為無咩人搭 Lift 同搭車   今朝班車仲早咗 3 分鐘到   好在我不嬲都早啲去等車咋   唔係走咗班車就慘喇 ~

菇場忙咗陣就做自己嘢   好過坐喺度嘛   哈哈 ~

Lunch Time 蒸完飯就出去萬寧買 Body Cream   因為尋日先同里奧大人講   如果有折再 88 折就抵買   所以今日買滿 $188 有 88 折真係好感恩呢 ~

原價 $152/支   我用咗呢個品牌幾年   已經加咗接近 $20 咁滯   因為里奧大人搽呢隻 Cream 就唔會皮膚敏感   所以我點都會買   但真係次次等到做特價先捨得買囉   

買完再去買厚襪褲   之後番菇場食飯喇 ~

里奧大人主打食咖哩   我就主打食牛展同雞翼

仍然唔忙就做自己嘢啦   所以話咁快就放工 ~

船頭話我好少着短褸   不過我真係多數買長褸同 One Piece   所以有啲同事見我着褲就會覺得好出奇   就算係里奧大人啲同事都係咁   仲話 One Piece 係我嘅 Icon   哈哈 ~

番到屋企即煮飯   今晚非常之簡單 ~

是日晚餐 - 咖哩雞拚司華力腸 + 滷水牛展拚雞翼 + 辣菜甫油麥菜

咖哩雞拚司華力腸 - 仲剩番啲薯仔同少少雞肉   所以加條司華力腸喇 ~

滷水牛展拚雞翼 - 比 4 隻雞翼做 Lunch Box   咁唔駛食咁多餐咖哩   一陣熱氣就慘喇 ~  

辣菜甫油麥菜 - 剩番 1 棵就煮埋去   好在仍然爽脆咋 ~

洗埋碗就開機洗衫   之後沖涼休息食下生果   因為里奧大人幫手熨咗衫 ~

買完之後先發覺香港都有得買   等我以為新嘢添   朱古力都唔滑嘅   唔怪得家姐話唔好味啦

啲柑係里奧大人同事請食㗎   仲拻埋添   尋日已經食咗 1 包   所以今晚要食埋另 1 包呢

睇多陣 Youtube   今晚 10 點 45 分先瞓覺 ~

咖哩雞配法包 + 滷水牛展拚雞翼 + 油麥菜 ( 29-DEC-2024 )

仲有 5 件未焗   可以留番聽晚食

( 29-DEC-2024  SUN )

尋晚瞓得勁唔好呀   我估真係飲咗 2 杯茶   所以今朝 7 點起身比較難度高呀 ~

沖埋涼就即出發   唔夠瞓個人都覺得特別凍   最搞笑家姐尋晚已經 Whatsapp 叫我着多件衫   因為上次着得好少衫   比佢鬧呀 ~

搭 Lift 嘅時候   個護衛員同我傾偈   之後話今年過得好快   我話係啦   眨下眼就 2025 年   之後我走啦   佢好開心咁笑住話我好靚女   再指住塊臉話我有酒粒好靚   真係好識氹人開心呀   哈哈 ~

同姐夫食早餐   佢一定係飲茶   不過我都無咩所謂   我唔係成日飲嘛 ~

薑蔥牛柏葉 - 呢個好味呀   同埋份量都幾多

香麻流沙包 - 麻蓉無咩味

香芋鴨腳扎 - 味道一般啦

咖哩蒸土魷 - 無咩味道

黑椒蒸牛仔骨 - 呢個好味   我覺得早餐食呢個好重口味   哈哈

鳳爪排骨飯 - 家姐同姐夫食嘅   我朝早唔係咁想食飯

飲完茶就番屋企   Berry 披住家姐件晨褸走出嚟   真係超級搞笑啦   依家工人會將家姐件晨褸蓋住 Berry   我話不如買件童裝比佢   不過家姐話唔駛喎   咁又係   因為 Berry 鍾意家姐陣味啫 ~

佢又係一路撲我一路尖叫   今次仲好高音   仲要係女仔聲呀   平時係老牛聲嚟㗎 ~

次次要迫佢跳上梳化   佢先冷靜到唔會大叫

伸懶腰

個美臀成日黐住我大脾

家姐話 Berry 都有白頭髮   哈哈

次次我一走   佢就會咁樣坐喺梳化

放低啲手信   之後叫家姐開嚟食   不過佢都只係食咗薯片朱古力   但佢話唔好味   同 ROYCE 無得比   哈哈   咁我話比番我食啦 ~

我又拎啲零食同家姐 Share   因為我買咗 1 份咋

CC 話好味   所以即同家姐 Share   始終我有啲只買 1 件   因為唔知好唔好味嘛   同埋如果樣樣都 2 件   一陣唔好味就大穫了

1 包好似得 10 粒

家姐朋友喺西班牙買嘅炸豬皮

又同我 Share   因為 1 月到期   一個人真係食唔到咁多   哈哈

同家姐咩都傾下   時間真係過得特別快   成日覺得仲有好多嘢未講咁 ~

好多時傾到咁上下   會突然覺得間屋好靜   咁就知道 Berry 瞓咗覺或者喺房   今日佢都算乖女    無入到房   但就全程好眼瞓咁囉   哈哈 ~

喺家姐隻小腿上面瞓呀   搞到家姐腳都痺埋   哈哈

佢確係好眼瞓

之後無啦啦咁望住我

里奧大人本身番 1 點半   不過佢 11 點都要番公司做嘢   所以我 12 點半都走喇 ~

家姐同 Berry 陪我等車   家姐又話我上車之後   Berry 周圍搵我喎 ~

今日坐車都瞓着咗呀   真係第一次咁   我都唔知自己幾時瞓咗添呀   不過瞓完之後真係精神好多   同埋係無瞓過龍   哈哈 ~

去麥當勞買埋午餐就去里奧大人公司   佢見到麥當勞都覺得好錯然   因為我成日唔比佢食麥當勞嘛 ~

板燒雞腿包套餐   我食蘋果批同細薯條就夠

食完再陪多佢一陣   差唔多 2 點半就番屋企 lu ~

開機洗衫再熨衫   之後做一陣家務   一望個鐘已經 5 點   真係要抖喇 ~

5 點半開始預備晚餐   係尋晚大食會食剩嘅嘢   只係焗同滾熱就搞掂 ~

里奧大人 6 點半番到屋企   所以即刻有得食喇 ~

是日晚餐 - 咖哩雞配法包 + 滷水牛展拚雞翼 + 油麥菜

咖哩雞配法包 - 超勁好味呀   味道係香辣   下次要問下用咩咖哩醬整先 ~

滷水牛展拚雞翼 - 又係好味   今晚晚餐食得好開心 ~ 

油麥菜 - 加豉油同炸蒜   咁樣無咁單調 ~

洗埋碗就沖涼   之後同里奧大人一路食蛋糕一路睇 ＂中年好聲音 3 " ~

家姐喺 A1 用積分換咗 2 個梳乎厘芝士蛋糕   因為佢要比一個我食

我覺得好淡味   定係我食之前食咗炸豬皮呢 ?!

睇完再睇陣 Youtube   今晚都係 10 點半瞓覺 ~