梅菜燜排骨 + 脆肉瓜 + 蕃茄薯仔湯 ( 8-DEC-2024 )

尋晚食剩   今晚再食少少同埋帶飯   咁就可以清哂去喇

( 8-DEC-2024  SUN )

今晚 7 點唔夠起身   但尋日飲咗可樂真係瞓得唔係咁好呀   下次都係咪搞喇   哈哈 ~

好在朝早唔多人坐車   我可以放喺隔離位

同家姐 姐夫飲茶係指定動作   不過我飲茶都 OK 嘅   我唔係成日去飲茶嘛 ~   

好想食煎尖椒呀   好少朝早會咁重口味   哈哈

都係來來去去食呢啲   因為選擇唔多   咁我無咩所謂   旨在食下嘢傾下偈啫

豬潤腸都幾多豬潤

但我就好鍾意食干蒸牛肉   唔係間間酒樓都有㗎

飲完就同家姐行超市   因為我叫佢幫我買咖啡   要睇下有無買得貴過超市喎   我話叫得妳買一定係平先買啦   如果同價我自己買都得嘛 ~

一入屋   我掛住放低嘢   未得閒摸 Berry 女嘛   佢係咁摸埋嚟   我要摸下佢   佢先唔怪叫 ~

叫佢上梳化冷靜一下   哈哈

第一件事係拎啲手信出嚟   同家姐講有啲要快啲食   佢見到所有手信都好開心   我話我買零食   就唔理三七廿一咩都買比妳先㗎   始終買哂比佢   我先安心買其他嘢比自己囉 ~

估唔到呢個環保袋非常好用   但唔記得邊間送㗎   上次我執嘢嘅時候想掉   但開嚟睇下又覺得唔錯咁   同埋最緊要輕   我去旅行成日袋住㗎

買比家姐嘅手信

家姐鍾意食曲奇之類嘅嘢   我買咗神戶芝士捧 (648 Yen) 同紅帽子嗰盒餅 (443 Yen) 比佢試下   而 Macadamia & Orange 百力滋 (1,188 Yen)   就係家姐話想食嘅

家姐叫我買㗎   因為日本只係 1,800 Yen 咋   不過賞味期限係 12 月 22 日   所以頂盡買 2 盒

我無買比自己   所以叫家姐開嚟睇下   之後佢又比咗啲我試下

之後糟糟打嚟叫家姐教佢寫啲嘢    又要我幫埋手   搞咗個幾鐘先搞掂 ~

家姐無啦啦去揚下件外套   點知咁啱 Berry 女放屁呀   成陣屁味揚過嚟   但 Berry 女個樣好尷尬   好得意呀   哈哈

Berry 女今日全程黐住我呀   成日用個美臀黐住我隻腳   不嬲都唔會咁㗎   今日叫佢上梳化都即刻上添呀   可能成個月無見我   太掛住我啦   哈哈 ~

想瞓覺

一路摸一路瞓   真係無咩幾何

影到好肥咁   但其實佢下巴係有張墊嘅

家姐拎件粉紅色風褸出嚟   同我講話唔可以再着件紫色   我話有人話妳呀 ?!   佢話今朝有另一個放狗工人問家姐工人   妳太太係咪好鍾意紫色   工人話係呀   哈哈 ~

好記得好耐之前   家姐衫褲鞋袋都係紫色   好在唔同 Tone 咋   我同佢講話妳今日全身紫呀   佢話佢好多同事都咁講咗啦 ~

Berry 真係點瞓都好   都會將佢個美臂黐實我隻腳   搞到我都唔敢郁呢

1 點左右走人   家姐帶埋 Berry 送我搭車   我上咗車見到 Berry 係咁望住啲人上車   想望下係咪我咁   但我已經喺車廂入面狂揮手啦   佢又見唔到   真係好搞鬼囉   之後家姐話我走咗之後   Berry 喺巴士站到兜圈搵我喎   講到佢好唔捨得我咁   哈哈 ~

里奧大人話開會到 2 點   咁我番到屋企放低嘢   抖陣再出去買麵包 ~

家姐喺何培腊味訂嘅   加瘦鮮鵝肝腸 ($162/斤) / 玫瑰三花腸 ($186/斤) / 臘肉 ($138/斤) / 臘鴨肶 ($46/2 隻) / 臘鴨餅 ($100/斤)

沙甸魚係糟糟朋友嘅西班牙手信   朱古力係糟糟之前喺英國買嘅   牛肉乾係姐夫朋友送嘅   家姐話比哂我   佢屋企仲有好多嘢要食喎

家姐又比 Coupon 我啦   佢同同事講   雪糕係咪 Free 㗎 ?!   唔係 Free 會比阿妹鬧㗎   所以佢依家會睇清楚先比我   好記得之前佢比 Starbucks Coupon 比我   我話我要比多幾十蚊買件蛋糕呀   家姐話關佢咩事喎   里奧大人都話無人叫妳買囉   妳就咁飲杯咖啡咪唔駛比錢買蛋糕囉   哈哈哈哈   自此之後家姐比親 Coupon 就會講呢件事   哈哈

買完就收到里奧大人電話話放工喇   我話去大家樂 Share 一個下午茶餐就夠喇 ~

好搞笑囉   里奧大人加咗個葡撻   話驚我唔夠飽   我話講得 Share 食一個餐   就肯定我唔太餓㗎喇 

食完番屋企   里奧大人就瞓晏覺   我就唔瞓喇   雖然我都有啲攰   不過要滾湯呢 ~

搞掂煲滾就熨 2 機衫   之後又睇下 Youtube   里奧大人 5 點幾起身   佢話唔餓   咁我話 7 點先食飯   呵呵 ~

是日晚餐 - 梅菜燜排骨 + 脆肉瓜 + 蕃茄薯仔湯

梅菜燜排骨 - 家姐買咗好多梅菜比我   真係要煮下喇   第一次整呢個餸   不過用咗 2 份排骨   煮起上嚟先覺得太多   里奧大人食咗 2 嚿排骨   我就直頭食唔落   所以幾乎原封不動咁   唯有聽晚再食過啦   哈哈 ~

脆肉瓜 - 唔食唔得啦   因為係星期四買呢 ~

蕃茄薯仔湯 - 7 個山東肉茄 + 4 個薯仔 + 1 條南同粟米   個湯真係好甜   依家唔鍾意加排骨   不過下次都加下先   咁做 Lunch 就夠哂飽啦 ~

洗埋碗就開機洗衫   之後同里奧大人睇 "Lucy"   估唔到都幾好睇

Filefish Snacks (950 Yen)   我覺得無咩味道咁   哈哈

得 6 片咋

頭先飲咗幾啖啤酒   10 點頂唔順要瞓覺呀   仲有 30 分鐘都唔睇喇 ~