焗午餐肉 ( 26-DEC-2024 )

尋日食剩嘅香草辣椒肉碎飯

尋晚食剩嘅辣汁蘑菇飯    不過都仍然食剩一半   所以叫里奧大人帶飯喇

( 26-DEC-2024  THU )

今朝瞓到 9 點半都醒咗   所以都即刻起身沖涼洗頭喇 ~

因為想比揮春比 CC   所以里奧大人話不如假期約飲茶   我梗話好啦   哈哈 ~

約咗 CC 兩公婆 11 點去飲茶   我哋早咗 15 分鐘到   咁去開位先喇   感恩可以坐窗邊位呀 ~

我哋叫咗 6 碟點心先   食完再叫 ~

紅油抄手 ($26.8) - 里奧大人必叫

香煎粟米餃 ($20.8) - CC 鍾意食   咁就好啦   我都好鍾意食餃子

懷舊芝麻卷 ($26.8) - CC 叫嘅   不過無咩芝麻味

勁味薑汁糕 (中) - 我叫㗎   勁好味呀   因為好煙韌同好重薑味   CC 都鍾意食呢個點心   本身諗住再叫   不過最後食到太飽就唔叫 lu

西杏片千層糕 (中) - 里奧大人叫㗎   都幾好味

鳳凰煎糯米雞 (頂) - 又係我叫㗎   突然好想食糯米雞

椰香手抓餅 (頂) - CC 一坐低就話上次食過一款點心覺得好好食   我即睇番 Blog   就係呢個手抓餅

雪山叉燒包 (大) - 好想食所以又叫喇

香酥牛乳卷 (中) - 兔兔叫嘅   估唔到幾好味喎

生財叉燒腸粉 (大) - 無試過腸粉   所以叫嚟食

祝壽紅桃仔 (中) - 我特登叫比兔兔食   因為佢前日生日   哈哈

翡翠牛肉球 (中) - 兔兔話唔食   我話你食和牛喎 ?!   之後 CC 話佢唔鍾意食混咗嘢嘅牛肉   所以唔食牛肉球同鯪魚球呢啲點心   之後我話其實佢好似無咩叫到點心咁   哈哈

食下傾下   咁傾開爆喼單嘢   之後 CC 同兔兔話下次應該咁咁咁   真係笑到肚痛呀   里奧大人差啲噴嘢添呀   笑到我哋個個都熱哂   哈哈 ~

咁又講買衫   我同 CC 以前特登請假去買衫㗎   仲係唔睇價錢   鍾意個款就即買   但年紀越大就越慳   仲要行勻哂先決定買唔買呀   因為依家會覺得有啲衫真係唔值得買呢   同埋買完又無着過   之後執完又拎去捐   係一件好煩嘅事囉 ~   

兔兔每次去日本都會買 1 件外套   所以佢買咗好多外套但又唔係成日着   之前 CC 幫佢執咗 73 件衫同褲出嚟捐   係裝咗兩個大嘅紅白藍袋呀   真係好誇張   唔怪之得 CC 唔比佢買啦   里奧大人話我同兔兔真係好似   不過我就聽佢講   唔會亂買嘢喎   呵呵 ~

之後傾打麻雀   我哋都話打麻雀真係要用腦   第時老咗可以約埋一齊打   但就打細啲   我話無問題喎   因為以前都係抽水食飯   CC 話佢阿媽同啲街坊打   真係打到傷感情   因為有個成日都輸   我話打麻將都唔會預咗實嬴喎   怕輸就唔應該打啦   CC 直頭話輸唔起就唔好打添呀   呢句我都認同   所以打麻將真係要睇心態   我同屋企人打真係旨在聚埋一齊玩   有時輸咗   我哋又會比番佢咁   完全唔會傷感情囉 ~

CC 唔知講開啲咩味道   兔兔話死老鼠味係最難形容嘅味道   但我就知呢   因為以前間公司一開水機   就成日有陣死老鼠味㗎   所以印象好深刻呢 ~

食下傾下   我問佢哋要唔要食炒粉麵飯 ?!   兔兔話飲茶梗係食點心啦   好在佢哋都唔食炒粉麵飯咋   因為其實我都唔想食   哈哈 ~

咁我同 CC 去完洗手間就直出去 Cashier 位置   里奧大人同兔兔就出去埋單先   之後兔兔話請   因為我哋上次請咗 CC 飲茶   我話嗰餐係 CC 生日飯嚟㗎   最後我哋點都比番兔兔囉   里奧大人話下次我生日先請食飯   好好笑啦   好似迫人記得我生日咁   不過 CC 就一定會記得嘅 ~

一齊去完德國寶睇嘢   之後分道揚鑣   佢哋要去德福   我哋就去 AEON 喇 ~

去完超市買菜同洋蔥就坐 Shuttle Bus 去德福   諗住睇羽絨   但行咗樓上   估唔到又見到 CC 佢哋   原來佢哋買完嘢就去麥記食啲嘢   用埋啲 Coupon 唔好嘥 ~

去馬莎睇嘢再去 Venchi 買朱古力   之後去 Haagen Dazs 食雪糕   估唔到又見到兔兔   因為佢等 CC 去洗手間   真係約埋都唔會咁啱呀   哈哈 ~

我食薄荷味朱古力雪糕筒

里奧大人食芒果紅桑子 & 抹茶雪糕

食完雪糕就去 JACK & JONES 買羽絨   里奧大人一定好鍾意囉   上次話諗下先   今次都係話諗下先㗎   不過我話你根本就鍾意   唔係點會再嚟睇吖   咁我話送比佢啦   因為佢今年對我好好   咁樣先肯要   哈哈   但到比錢嘅時候   佢又拎張卡出嚟   仲話同我一樣   我話關咩事呢 ?!   好在 Cashier 收咗我張卡先咋 ~

7 折之後就 $1,330 (原價 $1,899) 

買完就搭車番屋企   里奧大人即開機洗羽絨   之後再熨 2 機衫 ~

家姐比咗 $200 Cash Coupon   我都仲要補多 $116   我覺得好貴呀   同埋我又想同家姐 Share 呢   因為無佢嘅 Coupon   我都無得食呀   哈哈

原粒榛子牛奶巧克力磚 / 可可奶油巧克力

薄荷黑巧克力片 / 榛子蓉夾心巧克力 / 開心果巧克力 

焦糖軟心巧克力 / 黃金焦糖杏仁巧克力

里奧大人話想 6 點食飯   不過我話未餓呀   最後都係 6 點半先食飯   本來諗住淥油麥菜   但仲係好飽   所以就咁食飯算喇 ~

是日晚餐 - 焗午餐肉

焗午餐肉 - 諗住比里奧大人帶飯   所以開罐午餐肉喇 ~

洗埋碗就沖涼   抖陣就食生果 ~

睇睇下 Youtube 有啲眼瞓   原來已經 10 點半喇   所以即瞓覺 lu ~