焗蝦卷 + 榨菜粒蒸節瓜 ( 16-DEC-2024 )

( 16-DEC-2024  MON )

尋晚瞓得都 OK   可能食咗藥呀 ~

早餐食茄汁薄餅   都幾好味 ~

靈修 20 分鐘先番工   真係好耐無靈修喇 ~

菇場忙咗陣就做自己嘢   今朝最緊要唔好忙呀   因為下午放假 ~

一夠鐘就即走   叫家姐喺車站等我   因為諗住剪髮   但唔係家姐剪開嘅髮型師   所以唔剪 lu   咁行咗陣再去買午餐番屋企食喇 ~

  

泰式斑蘭軟糯甜糕 ($20) - 買 1 包試下 

一入屋   Berry 女又係吠到顛咗   所以工人就話 Berry 真係好鍾意太太   家姐就會啤住佢    工人就會喺度大笑   哈哈 ~

飛機耳嘅 Berry 真係好肉酸

咁樣真係靚女好多   哈哈

泰式烤雞扒飯 ($68) - 工人鍾意食雞飯   咁就啱喇   因為我只係想食啲小食同飲杯咖啡

牛丸+魚片頭冬蔭功湯金邊粉 ($78) - 湯底幾好味   但比漏咗牛腱肉囉

泰式蝦春卷 3 件 (+$28) / 串串沙爹雞豬 (各 1 串) (+$28) - 新鮮炸起嘅蝦春卷都幾好味   

我同家姐每人 1 杯泰式咖啡

食食下飯   姐夫同朋友都番咗嚟   咁又傾下計啦   佢朋友收養咗隻唐狗   但乖過 Berry 好多   哈哈 ~

家姐煲咗龍脷葉

家姐話快啲錫新媽咪啦   我同 Berry 講話跟我番屋企好無呀 ?!   工人話 Berry 唔識講咋   如果佢識講就會話 "好" 呀   笑死我同家姐   又話如果 Berry 唔係住喺家姐屋企先   咁一定係好開心咁住我屋企   我話無太太就無 Berry 啦   佢係都要激下家姐   哈哈 ~

幾難先引到佢入房呀

高高在上嘅 Berry 

知我哋走啦   佢就即上床

喺日本買嘅牛蒡條 (626 Yen)   CC 話好味   所以即同家姐 Share 啦   我買咗 1 包咋   因為家姐唔係咁鍾意食呢啲健康零食

好快就 2 點半   要出門口喇 ~

去診所拎報告再去 Body Check   本身 Book 咗 4 點   但 3 點 45 分左右去到   所以 4 點 07 分搞掂   感恩感恩 ~

同家姐睇錶   隻錶價錢係 $149,000   我話啲款好老土都要咁價錢   之後再去睇個袋   價錢係 $153,490   我話二手袋都要十幾萬   家姐叫我睇清楚啲   我話十幾萬吖嘛   佢話妳再睇清楚啦   我連手指都出埋再話十五萬吖嘛   之後我話妳唔係睇咗百幾萬呀嘛   我話 6 位數字喎   妳唔係以為 Dollar Sign 係個 5 字呀嘛   之後佢喺度大笑   我話仲好意思笑   哈哈 ~

經過 759   家姐話入去睇下糖   我話唔入啦   但最後好在有入咋   因為家姐聽到正價 7 折呀   本身包糖要 $9.9   但家姐話原價 ($12.9) 7 折仲抵啦   所以即刻買咗 20 包糖   因為 7 折之後只係 $9/包咋   唔係家姐聽到   我真係唔知有 7 折囉 ~

家姐去埋恆香買老婆餅就搭地鐵   咁我都一齊搭啦   佢好搞笑囉   話陪我去轉車   驚我搭錯線   我話我識睇啦   唔好嘥時間陪我囉 ~

去埋買迷你環保袋就番屋企   里奧大人以為我請上午陪家姐呀   所以我番到屋企佢好愕然 ~

我送咗個比家姐   佢非常鍾意呀   之後話糟糟同貓夫人都一定鍾意   咁我再送埋比佢哋啦

家姐幫我揀㗎   話貓爪好得意

三色糙米 ($8) / 三色藜麥 ($18)

今晚早咗番屋企   咁早啲煮飯   6 點 20 分可以開飯喇 ~

是日晚餐 - 焗蝦卷 + 榨菜粒蒸節瓜

焗蝦卷 - 唔知煮咩好就焗佢啦   咁里奧大人就可以帶飯呢 ~

榨菜粒蒸節瓜 - 將尋晚食剩嘅燒鴨切粒粒   再加啲榨菜   所以里奧大人話好食囉   如果就咁蒸節瓜就唔會點食㗎 ~

食完飯同里奧大人出去整啲嘢   之後就番屋企 lu ~

沖埋涼就休息   里奧大人今日幫手洗衫同熨衫   我可以做少一樣家務 ~

一開就聞到好濃嘅牛蒡味   同埋又薄又脆   我初初以為係硬崩崩㗎   估唔到家姐都話好食   好在真係同佢 Share 咋

里奧大人食第一粒嘅時候   佢話我實鍾意食   因為好煙韌   之後我食啦   真係好煙韌

睇陣 Youtube   今晚 10 點半都瞓覺喇 ~