Saizeriya ( 薩莉亞意式餐廳 ) @ 紅磡 ( 15-MAR-2024 )

原味雞翼 ($20) - 真係好味㗎喎   所以里奧大人都話其實我哋每次嚟都係食嗰幾款   哈哈

莎樂美腸薄餅 ($36) - 原來里奧大人鍾意食呢個薄餅多啲   因為平時就咁叫芝士嘛

蕃茄煙肉意大利粉 ($30) - 今晚想食酸咪咪嘅嘢

中華海草 (雙倍) ($18) - 呢個好抵食   同埋里奧大人都好鍾意食㗎

( 15-MAR-2024  FRI )

感恩尋晚瞓得都唔錯   今朝起身牙肉都無咩點痛喇 ~

煲埋薑茶再焗麵包   搞掂已經 7 點 45 分   可能太耐無咁整   所以咩都做慢咗   哈哈 ~

搞掂就拿拿聲沖涼洗頭喇   好在剪短咗頭髮   咁就唔駛搽髮尾油再慢慢卷頭髮呢 ~

8 點先開始食早餐   好耐無食甜餐包夾芝士   尋日我特登買丹麥條同甜餐包   諗住又鹹又甜   但里奧大人又無講今日放假   咁費事芝士擺咁耐   所以留丹麥條比佢食算喇 ~

見有時間   我擺好哂啲衫入洗衣機   等里奧大人起身可以開機洗衫   今朝好似做咗好多嘢咁   哈哈 ~

菇場唔忙   可以抖下 ~

Lunch Time 出去惠康買福麵同福米   因為家姐想試包福米   同埋佢話工人話 4 包 $45.9 抵喎   咁我就去買囉 ~

不過第一間惠康無福米   咁再去另一間睇下   感恩有福米   因為家姐想試   所以好想買比佢呀 ~

買完諗住食牛筋河   不過見食店都好多人   所以買雞翼酸辣米線番菇場食算喇 ~

諗住唔忙   但要長命 Report   咁都好   有啲嘢做   時間過得快啲㗎 ~

放工即走   同里奧大人出去食晚餐 ~

食完行下就番屋企   抖陣再去祈禱會 ~

不過今晚祈禱會都唔能夠專心   因為頭先阿喂話 mi 媽入咗院   聽日取消 Gathering   之後阿 mi 又話媽咪急救緊   聽完之後同里奧大人為 mi 媽急切禱告   求主醫治 ~

因為祈禱會期間唔方便睇電話   但手機一震就好驚   驚係唔好消息嘛   所以全程好驚   對手都好凍到硬啦 ~

祈禱會完畢即睇 Whatsapp   知道 mi 媽情況穩定   感恩感恩 ~

里奧大人同麵包傾咗陣   之後見到皇太后又傾咗陣   佢問我好番未 ?!   我都差啲唔記得之前感冒添   我其實只係覺得每月一到跟足一個月先係最辛苦   哈哈 ~

諗住番屋企   里奧大人好開心咁話去買雪糕   里奧大人真係好搞笑   頭先明明話唔食啦   食呢啲無益   但一個鐘頭後又話要食雪糕   佢自己都忍唔住笑呀   等佢成日話我一事一樣   依家都佢係咁   哈哈 ~

食完都即刻沖涼喇   原來都已經 9 點半 ~

睇陣 Youtube   今晚差唔多 11 點先瞓 ~