麻婆豆腐 + 蒜頭豆豉炒脆肉瓜 + 鵝掌翼 (外賣) + 紅棗黑豆雞腳湯 ( 18-NOV-2009 )

( 18-NOV-2009  WED )

今朝仲係好凍   所以食麵暖身   食完麵都唔出汗真係好爽呀 ~

又係勁忙   覺得啲時間過得好快   快到有啲得人驚呀 ~

 
Lunch Time 又去大榮華買點心   今次食叉燒包 + 紅豆沙   本來諗住唔要叉燒包驚太飽   不過好在有叫咋   因為紅豆沙得幾粒豆   無料到嘅   飲水咁   但又唔好意思叫多豆喎   下次唔食喇 ~

忙多陣終於做完   有啲失落咁呀 ~

  
是日晚餐 - 麻婆豆腐 + 蒜頭豆豉炒脆肉瓜 + 鵝掌翼 ( 外賣 ) + 紅棗黑豆雞腳湯

麻婆豆腐 - 個汁係跟食譜整   第一次整唔錯啦   但里奧大人話唔夠味   唔係嘛   辣豆板醬喎   又話驚辣喎   早知落多啲啦   

蒜頭豆豉炒脆肉瓜 - 菜心要 $13/斤呀   太貴啦   食瓜算喇   4 條都係 $5   平好多啦   又好味喎 ~ 

鵝掌翼 (外賣) - 突然好想食呀   所以買咗兩隻   里奧大人又唔鍾意食   獨食真係好爽呀 ~

紅棗黑豆雞腳湯 - 媽咪煲㗎   勁好味呢   整完哂又同里奧大人散步   我又唔覺凍   可能用熱水洗完碗啦   但里奧大人一路行一路話凍   我買雪糕食   佢話喺商場入面等   我話唔想行咁快   佢話咁佢行入商場先   我話不如自己行啦   不過佢又好怕凍嘅   早講嘛   可以唔行家嘛   又係都要陪我 ~