沙爹王滋味世界 @ 旺角 ( 25-NOV-2009 )

( 25-NOV-2009  WED )

今朝一起身打噴嚏索鼻涕   里奧大人問係咪傷風   我話唔係   就算係都話唔係啦   因為今晚有約會呀   番工前去超市買盒 Hot Lemon   希望搞得掂啦 ~   

早餐食三文治   因為有塊芝士感覺健康啲 ~

番到菇場唔理三七二十一走去沖咗杯 Hot Lemon 先   唔係一陣無水   又要等煲好煩呀 ~ 

晏晝再食薑蔥麵 + 薑菜蜜   飲完嗰下好掂   通哂個鼻   但之後又一樣鼻塞塞 ~

幾辛苦先捱到 5 點半呀   今晚我約咗 卡卡 同 木木  去旺角沙爹王食飯呀   食呢餐飯真係一波三折   唔係貴得滯   就係限時限刻   好在可以一路上網搵地方一路傾   咁就可以知道大家 OK 唔 OK 嘛 ~   

因為木木比較遲放工   所以就同卡卡出旺角先   陪佢買啲嘢再去沙爹王搵位   早啲去好啲   可以揀啲位   坐得舒服啲嘛 ~  

第一次見木木咋   不過都知道大約會係點嘅樣   呵呵   平時喺 Blog 度咀 Jel Jel   估唔到又幾怕羞喎   同埋卡卡太多嘢講喇   機關槍咁   係人都怕咗啦   哈哈 ~

今次又有見面禮   係木木親手整嘅 Jam 曲奇同玻璃曲奇   仲印埋字呀   好有心機好靚呀   至於卡卡就送咗元朗特產蛋卷比我囉   好在我都買咗兩包百力滋比佢哋咋   唔係真係唔好意思呢   呵呵 ~

去到嘅時候樣樣都好想食   所以係咁叫嘢   但估唔到係一次過嚟哂囉   好趕咩   不過出面真係好多人等位   諗住影完就食   點知又嚟另一樣喎   總之不斷影不斷嚟   好似 15 分鐘內嚟哂所有嘢食   影完想食第一樣嘢嘅時候   都唔覺得熱咯 ~ 

一路傾一路食又過咗兩個幾鐘   快到呢   如果番工啲時間過得咁快就好喇 ~

番到屋企影埋啲禮物  再比曲奇里奧大人食   佢話好好食   話呢啲就係曲奇喇   咁我之前整嗰啲唔係咩 ~