巴東咖哩薯仔雞翼 + 節瓜瑤柱蠔豉瘦肉湯 + 蘋果粟米紅腰豆沙律 ( 1-APR-2012 )

( 1-APR-2012  SUN )

今朝 10 點起身   沖個靚涼就去麥當勞食早餐   之後番屋企坐陣就番教會 ~

咁我打比媽咪   佢話氣促同頭暈   之後好似喊住話好驚   想入院但又驚一陣又留喺觀察病房   之後出院   我話唔舒服就梗係入院 Check 咗先   咁叫得妳出院即係代表無事嘛   咁妳入院又話驚   叫妳出院又話驚   咁即係咩   講到我火嚟   之後我話是但妳啦 ~

其實我真係唔知驚咩囉   基本上呢 4 個星期六都話氣促   之前兩次就喺觀察病房 Check 啦   Check 完話無事可以出事   第 3 次就住兩日就可以出院   第 4 次就無入院   咁我同家姐就輪流睇住佢   今次又係假期氣促   所以我第一直覺係咪形住氣促   如果氣促就第 1 時間按平安鐘   唔好成日等幾個鐘先按   話自己抖下先   我話過好多次   反正妳都要按   點解要等自己頂唔順先按呢   不過我依家都費事再話   反正佢都係咁   所以基本上我次次聽到佢入院   我次次都係火嚟先   之後先擔心 ~

咁我同里奧大人呻完就番屋企睇媽咪   好感恩原來家姐都已經喺媽咪屋企   家姐話媽咪隻手水腫   咁應該又係肺積水引致到氣促   所以都決定按平安鐘 ~

好快就有 4 個消防員嚟咗   我第一次見係咁咋   因為之前都無嘅   佢哋一嚟到就幫媽咪 Check 血壓   比氧氣媽咪聞   超細心呀   媽咪無啦啦又喊住話好驚   佢哋拍拍媽咪話唔駛驚   深呼吸   同埋話媽咪血含量好低   得 50   所以可能有機會暈喎   之後又有 3 個救護人員黎咗   等媽咪好啲就落去救護車喇 ~

今次我跟車   要等埋媽咪血壓心跳正常先開車   所以又同啲救護員傾偈   上車傾到落車   真係差啲唔記得媽咪唔舒服坐緊救護車去醫院添   哈哈 ~

其實好感恩   媽咪話次次啲救護車人員都好好   成日講笑氹媽咪   等佢唔駛咁驚 ~

去到急症室超多人呀   媽咪無床位添呀   要坐喺輪椅度等   之後再照 X-Ray   話媽咪個肺花咗同埋肺炎   所以要留醫   家姐無耐又嚟埋   等咗半個鐘先上房呀 ~

上到房放好哂嘢已經 3 點 3 lu   我同家姐一齊坐的士去九龍灣   佢要過海搞嘢   所以我同里奧大人就去食 Tea 喇 ~

邪啦   尋晚買哂湯料同薯仔   今朝又浸定蠔豉同解凍咗雞翼   唔係唔煮喇   咁樣可以探下媽咪   我又唔駛咁鬼攰 ~

里奧大人去跑步   其實我想去   不過真係好攰   同埋又未熨衫   都係唔去喇 ~

家姐探完媽咪就上嚟食飯   真係整定㗎   我平時煮 6 隻雞翼   咁今次就煮 12 隻   諗住食唔哂   就留番聽晚翻熱食   整少一樣餸   但媽咪入咗院   聽晚都煮唔到啦   所以叫佢幫手食囉 ~

是日懶餐 - 巴東咖哩薯仔雞翼 + 節瓜江瑤柱蠔豉瘦肉湯

巴東咖哩薯仔雞翼 - 包咖哩醬完全唔辣嘅   我要加多 12 條指天椒先夠辣呀   咁先正家嘛   本來諗住煎印度薄餅   點知原來過咗期 4 個月   所以改為煮扁意粉喇   都好好食   索哂啲咖哩汁超正㗎   真係 ~

節瓜瑤柱蠔豉瘦肉湯 - 媽咪煲呢個湯好好飲   但我煲就完全無味嘅   哈哈哈哈   家姐飲第一啖話好淡茂茂   係咁講係咁講 ~ 

蘋果粟米紅腰豆沙律 - 之前買咗 6 個細富士蘋果嘛   所以咪整沙律囉   我唔想再成日掉生果呀 ~

家姐 9 點半就走喇   我就去沖涼 lu   之後就陪里奧大人睇錄咗嘅電視劇 ~