肉絲炒麵 + 節瓜鹹蛋肉片湯 ( 22-APR-2012 ) + ( 23-APR-2012 ) + ( 24-APR-2012 ) + ( 25-APR-2012 )

( 22-APR-2012  SUN )

今朝居然 11 點15 分先醒   番唔到教會喇   我問里奧大人點解唔校鬧鐘   佢話平時多數瞓到 10 點幾就自然醒   所以無校鬧鐘   估唔到會瞓到咁晏 ~

咁晏都無早餐食   所以我煮麵喇   好耐無煮   間唔中喺屋企煮早餐真係唔錯   感覺唔駛咁趕   食幾耐都得 ~

洗完碗又做下家務啦   反正里奧大人做公司嘢   我做完就 Hea 下喇   每月一到呀   所以都唔比自己咁攰喇 ~

里奧大人個肚有啲唔舒服   所以去大快活食 Tea   本來佢話陪我買餸   好似好耐無陪我咁喎   不過我話唔好喇   一陣肚痛仲煩   叫佢快快番屋企呢 ~

差唔多 6 點佢就去跑步   我就預備晚餐喇 ~

是日懶餐 - 肉絲炒麵 + 節瓜鹹蛋肉片湯

肉絲炒麵 - 今次醒喇   買一個麵餅算喇   $3.5 一個麵餅真係幾抵食   再加埋滾湯嘅肉片嚟炒   咁就有碟肉絲炒麵   平靚正又方便   最緊要唔好浪費嘛 ~ 

節瓜鹹蛋肉片湯 - 我覺得自己真係好耐無滾湯咁呀   里奧大人又成日咁夜番   都唔會飲湯嘅   我都懶得滾   好在媽咪屋企有煲湯   唔係真係好 Dry 都似   我覺得湯水好緊要   因為我做女時晚晚有湯水飲   結婚初期就唔識滾湯煲湯   又懶去媽咪屋企飲湯   所以係完全無湯水   楂 Lift 阿姐話我塊臉好黃好乾呀   嚇得我即刻請問糟糟點滾湯   好記得一生人第一個滾湯就係節瓜鹹蛋肉片湯   因為夠簡單 ~

( 23-APR-2012  MON )

早餐諗住食奶醬脆脆豬呢啲甜包   點知居然無   所以轉食腿蛋治 ~

菇場又靜到耳嗚   又超眼瞓   好彩朝早啲時間過得快啲   唔係真係幾難頂 ~

Lunch 又食叮意   今次買咗日清嘅拿破崙蕃茄意粉   超難食呀   我仲買咗 3 盒   有排捱喇 ~

個肚唔多舒服   不過比平時好好多   不過就有啲怪怪哋咁   所以放工即睇醫生   好彩無嘢 ~

無胃口呀   瞓咗陣就食個芒果算喇   里奧大人差唔多 11 點先番到屋企   同佢傾陣計就瞓覺 lu ~

( 24-APR-2012  TUE ) 

無啦啦差唔多 7 點先肚痛   所以最後都無番工   喺屋企休息 ~

瞓到 4 點幾打去診所問有無得補假紙   有就去拎   無就 A/L 算   真係好感恩有得拎呀 ~  

都無無胃口食嘢啦   里奧大人 10 點半仲見緊客   所以我就入房瞓先喇 ~  

( 25-APR-2012  WED )

個肚都有少少痛   不過都 OK   但一番到菇場就扯住扯住痛又嘔   真係好難頂   9 點半食粒超勁止痛藥   家姐話呢粒藥好勁   食完可以跳舞   不過就應該勁傷胃啦   一定要食 2 粒胃藥   我又無食到嘢   所以其實真係驚胃痛   不過唔理喇   食 2 粒胃藥算數   但 10 點半仲痛喎   所以頂到 11 點 15 分就請假番屋企喇 ~

睇完醫生就番屋企沖涼瞓覺   1 點半醒咗   一啲都唔痛呀   咁即係要 3 個鐘頭先有料到   下次早啲食先   咁就應該可以番工喇 ~

又煲碟   又頭暈暈   應該餓啦   所以即叫外賣廈門粉米   估唔到 4 點 50 分叫外賣   都要 5 點 20 分先送到 ~

食咗少少咋   仲有大半盒可以留番聽日做 Lunch Box ~

食完又煲碟   今晚好好喇   里奧大人 9 點放工   所以叫佢買碟菜比我食   食啲熱嘢舒服好多呢 ~