咖哩薯仔雞翼 + 印度薄餅 ( 22-SEP-2013 )

( 22-SEP-2013  SUN )

今朝 9 點半起咗身 lu   里奧大人話我瞓到攣公蝦米咁   話幫我再蓋多張被都無郁   問我係咪好凍 ?!   我又唔係好凍喎   不過我習慣唔係仰睡嘅   好似好無安全感   同埋唔鍾意望住天花   細個睇得恐怖戲多呀   哈哈 ~

又打風喇   今次呢個 "天兔" 嘅威力都好勁   直頭話係全球史上最強風暴添呀 ~

落街先知道落緊雨   又無帶遮   所以去大家樂食早餐   好耐係食   好有新鮮感 ~

抖陣又番教會喇   崇拜完畢就去百佳買紅蘿蔔薯仔   因為打風   街市都會坐地起價   所以去百佳算喇   最緊要里奧大人可以幫手攞呢 ~

2 點半去食 Tea   睇到電視寫住黃昏前會掛 8 號   是但啦   反正假期   幾點都無咩所謂囉 ~

干炒豬扒公仔麵 - 今晚唔煮飯   所以留番大半碟聽日做 Lunch Box  

干炒三絲意粉

今晚煮咖哩   所以番到屋企就要預備喇   之後再煲中藥就 Hea 過喇 ~      

7 點半開餐喇   唔想太夜食呢 ~            

是日晚餐 - 咖哩薯仔雞翼 + 印度薄餅

咖哩薯仔雞翼 - 今次好有心機整啦   因為無煮燶呀   同埋我又煎埋啲薯仔雞翼   唔駛成日煮到散哂   但里奧大人話有紅蘿蔔好怪   我話有咩怪啫   唔鍾意食就話怪   你先怪呀 ~

印度薄餅 - 里奧大人最鍾意食   不過又真係好味嘅   最緊要方便嘛   唔駛解凍同落油   就咁煎幾分鐘就搞掂 ~

早食早洗碗   搞掂哂都係 8 點幾   實在太開心喇   好多時間用咁   爽呀 ~