南丫島半天遊 + 香港仔魚蛋粉 @ 旺角 ( 20-SEP-2013 )

牛什河 - 最鍾意多蔥

魚蛋魚片頭河 - 里奧大人話要清清哋   但落辣椒油多過我喎

菜心

我覺得呢間香港仔魚蛋粉嘅燈好靚   因為唔係間間都係咁

雙皮燉奶 - 食完當堂飽到上喉嚨

薑汁燉鮮奶 - 咁我唔想兩碗都一樣   咁里奧大人又話會幫手食   點知又話呢碗薑汁唔好食   食到佢反胃喎   反胃咁大鑊   咁即係要我食哂囉

( 20-SEP-2013  FRI )

放假好開心呀   今朝瞓到 10 點 40 分自然醒   但其實里奧大人好早已經醒咗   見我瞓到豬一隻咁先唔叫我咋   哈哈 ~

尋晚同里奧大人講如果早起身就去 Delifrance 食早餐   依家唔駛啦   所以又去番金姆指喇 ~

食完就番屋企抖陣   沖埋涼就出發去坪洲喇 ~

感恩好快有 619 同 603   差唔多 1 點去到中環碼頭   但去坪洲要 1 點 40 分先有船   所以我哋轉去南丫島喇   因為 1 點 30 分有船   其實都唔係差好耐   不過我覺得坪洲無咩嘢睇   純粹行山   但今日爆熱   所以一定唔行山   我仲有好多嘢未實現   所以想留番條命仔呀   所以即轉去南丫島 ~

BB 背脊塊墊係絨毛   仲好厚身   我望見都熱呀   之後見到有個鬼婆仲勁   着乾濕褸呀   我勁想叫佢除咗去呀   哈哈 

估唔到去南丫島好快喎   聽咗幾首歌就到咁嘅   一落船就影下相先啦   因為我覺得好熱   之後應該唔會點影相㗎喇   哈哈 ~

2 點 lu   其實都唔少人入南丫島

釣完都唔敢食啦

望住個海真係好舒服

我唔會再行前影   因為好驚跌落海   所以里奧大人話我無鬼用
   


我想坐埋去影   里奧大人問我唔驚咩 ?!   我話唔驚   行到埋去就擰住頭同佢講   我都幾驚   我都係唔坐喇   哈哈

行行下有個女仔望住我   係好想同我打招呼果隻咁   我覺得好奇怪   因為我真係唔識佢   原來佢係我同事 PMS 個朋友   可能 PMS 同佢朋友講見到我   所以望住我   我覺得我最搞笑係反而望唔到 PMS   之後傾咗幾句   我仲以為佢咁早就行完   但原來佢話有個朋友唔舒服   所以行唔到山   要出番市區呢 ~

同里奧大人周圍行陣先   實在太熱喇   所以買杯百香果珍珠   飲完舒服好多 ~

百香果珍珠   啲珍珠好煙韌呀

又見到

之後又行下   差唔多 2 點半就去食嘢喇   今次又去土耳奇餐廳   因為坐近門口   啲人出出入入好唔方便   咁里奧大人話轉位坐牆邊啦   點知焗到呢   反面門口有風扇吹到   所以里奧大人好內疚啦   因為知道我好焗唔太舒服   同埋唔知點解對眼好澀呀   超辛苦 ~

炸魚薯條 - 魚唔腥   脆漿唔厚   都唔錯喎

烤雞串燒卡巴 (配比得包 + 2 款土耳奇醬汁) - 想食好耐喇

土耳奇鮮制檸檬特飲 - 轉特飲要加 $15/杯   無冰嘅   同埋一陣洗潔精味道咁   之得要汽水好過   肯定夠凍嘛 

做生意嘅地方多數有招豺貓

上次冬天嚟食   我哋坐出面好舒服㗎   但今日爆熱   一定唔會坐   哈哈  

食完又去買枝香茅茶    之後又行下喇   好感恩買到相機袋呀   細細個夠輕身   因為之前嗰個袋好重   所以佢成日都留意啲相機袋   係佢見到咋   如果唔係佢又要再搵呢 ~

買飲品嘅地方就會好多人   因為今日實在爆熱喇 

行行行   真係太熱   所以見到舖頭就入去過冷河喇   最後買埋包辣椒欖就走人 lu ~

呢度係喺間有機店入面影   咁好多人都買雪條食   咁就可以坐喺入面食   嘆下冷氣   又可以坐出面食   吹吹海風   咁里奧大人係都想我食雪條   仲以為佢好想食   點知原來佢知我好熱   想我坐下抖下涼陣冷氣咁呢   不過最後我都無食   唔想一次過食咁多凍嘢

好多人都帶埋狗狗出街   呢兩隻坐到咁埋   我覺得好得意呀


坐 4 點半船   我哋 4 點 05 分去到碼頭已經見到有船   之後等等等   碼頭開始超勁多人   又焗喎   最慘係唔開風扇   離哂大譜啦   同埋係 4 點半先開閘   唔係 4 點半開船囉   最搞嘢係架船去到中環碼頭   船一停就即刻熄哂冷氣   差啲焗暈 ~

里奧大人有備而戰   就係帶多件 Tee 呀   所以去到 IFC 即換 Tee ~

好口渴呀   所以勁想飲茶   我好少喺售賣機買嘢飲嘛   不過實在太口渴   所以點都要買嚟飲   咁里奧大人話先按價錢後按飲品   但都唔得嘅   咁我又唔識嘛   仲以為佢搞錯   咁我亂按啲飲品制啦   無啦啦跌咗罐奶茶落嚟呀   唔怪得之頭先按錢按唔到啦   咁即係頭先有人按咗制不過唔識用   呵呵   有免費飲品真係好感恩呀 ~

原來我嗰罐仲係 Last One 添   呵呵 

里奧大人知我想買背囊   所以就搭地鐵出太子   因為我話聯合廣場可能有得買   好感恩真係有呀   買咗個牛皮背囊同斜揹袋   加埋都係 $1,000   真係好在上次無心急買個背囊咋 ~

本來我想走   因為驚自己再買嘢   但里奧大人話反正到咗就行埋喎   又比我買到 2 條 One Piece   咁我話真係走喇   唔想再買嘢 ~

晏晝食咗薯條   里奧大人話今晚要食清啲   咁就去食粉麵啦 ~

食完去義順食雙皮奶   其實我好飽唔想食   不過齋坐唔食要比 $10   咁我就食啦   真係飽到上喉嚨 ~

今晚坐小巴番屋企   諗住去百佳買汽水   點知無   之後里奧大人記得我話對鞋着得舒服   想買多對   所以又再去買鞋   不過要訂   月尾先有得攞 ~

番到屋企第一時間沖涼呀   之後開機洗衫同煲中藥   差唔多煲完嘅時候   我聞到燶味   仲以為我煲燶藥添   但原來又唔係   因為都無黐底   同埋仲有成碗喺度   無耐有人勁按屋企門鐘   原來管理員嚟㗎   問我係咪煲燶嘢   最搞笑里奧大人話係   之後我同佢講   唔係我哋煲燶噃   佢開番門同管理員講話唔係   不過好奇怪就係未開門之前   啲燶味真係由我廚房傳出嚟   但之後開咗門   啲燶味就喺出面傳出嚟   最驚人喺後門燒嘢咋   好在差唔多半個鐘就後就無咗燶味呢 ~

難得聽日唔駛番工   所以里奧大人就睇番之前錄咗啲電視劇   我就打機同睇雜誌   差唔多 12 點幾先瞓   如果我聽日唔駛番工就好啦 ~