Dandy House @ 鰂魚涌 ( 16-SEP-2013 )

蒜蓉法包 - 超細塊   脆卜卜   勁似食脆多士

羅宋湯 - 無咩味道  

紅酒汁安格斯西冷牛扒 - Grill 過嘅牛扒真係好好味   下次有機會再食呢   

薯格好脆好乾   我就麻麻哋 

沙律菜   

拿破崙長通粉 ( 配沙樂美腸 / 火腿 / 煙肉 / 洋蔥 / 青椒 ) - 我覺得個汁甜咗啲   不過我唔知拿破崙係咪味道偏甜   哈哈

熱檸蜜 / 百香果茶 - 家姐杯百香果茶好飲呀   因為好香百香果味   之後家姐係咁玩個杯   係咁按係咁按   按到杯茶完全無哂百香果味   得番啲茶味 　

啫喱 - 是日甜品   有啲失望   哈哈

有貓貓狗狗公仔陪住妳食飯呢

其實室內好暗

( 16-SEP-2013  MON )

尋晚太夜食生哈蜜瓜   所以半夜去咗  2 次廁所   起身有啲難度   不過依家朝早要滾熱啲中藥   所以都唔會懶床   唔想嘥時間呀 ~

早餐食芝腿治烘底   其實之前自己買咗 2 Pack 芝士   諗住間唔中食下   不過依家朝早好多時都食芝士   所以比咗 1 包家姐   因為家姐星期六都會整下芝蛋治嘛   同埋唔想擺到差唔多過期先食 ~

真係有啲攰   番到菇場都無咩心機上網   但又唔係話眼瞓嗰隻   咁都好啲 ~

今日 Lunch Box 只係雞翼同西蘭花   所以焗個泰式清湯貴刁   個貴刁好味呀   同我以前食嘅一樣味道   因為已經無出好耐好耐   仲諗住以後都搵唔到呢隻味道   估唔到上次喺惠康見到   不過唔係食開嘅牌字   但我勁想食   所以買嚟試下   又見係 Made in Thailand   咁味道應該唔差   估唔到係好味添呀   哈哈 ~

忙咗陣就 Hea 過喇   都仲係攰攰哋   好在今晚唔駛煮飯   可以抖下 ~

今晚放工去鰂魚涌睇中醫   慣性睇中醫係去尖沙咀   所以我搭錯車啦   好在去緊樂富嘅時候覺得有啲奇怪咁   先知自己搭錯線呀 ~

今次遲咗啲   差唔多 6 點半先到鰂魚涌   感恩去到中醫係無人   之後我睇完   見到有幾個等緊喇 ~

今晚里奧大人同同事打邊爐 Farewell   咁我就同家姐食嘢喇   家姐朝早已經問我食咩   中西日韓任我揀喎   不過我樣樣都話唔好   哈哈   勁煩呀   因為佢又周圍問同事有咩好食嘛   問哂人之後我又話唔好   呵呵 ~   

我唔想食生冷嘢   食韓國嘢又驚太飽   所以家姐話帶我去食西餐   話唔錯㗎   咁我就去啦 ~

可能地方比較隔涉   所以無人食   我同家姐好似包場咁   但我覺得環境真係唔錯   暗暗燈光   又播好熟悉嘅英文歌   感覺真係好 Relax 呢 ~

今餐家姐係都要請   但我話我請啦   因為陪我睇中醫又食飯   之後老闆娘話咁好朋友邊個請無所謂啦   一係 Share 囉   搞笑 ~   

非常感恩呀   去到巴士站即刻有車   今晚我諗住徑步   咁同家姐講我想喺官塘行路番屋企   好在真係同家姐講咋   原來我地可以喺牛頭角落車   咁行番屋企都好近   同我平時喺牛頭角睇中醫行番屋企差唔多咋   如果喺官塘行   真係起碼 40 分鐘   依家差唔多 20 分鐘就搞掂 ~

我送埋家姐坐巴士就番屋企喇   煲埋中藥就沖涼   之後里奧大人就番嚟喇   佢去小肥牛打邊爐   所以我大力索佢件裇衫   成陣邊爐味呀   不過成間都打邊爐   邊爐味實走唔甩啦   哈哈 ~

里奧大人 11 點瞓   我打機打到 11 點半先瞓   玩物喪智添 ~