酸梅麵豉蒸排骨 + 菜心 + 芫茜皮蛋魚片湯 ( 13-JAN-2014 )

( 13-JAN-2014  MON )

感恩一覺瞓天光   實在太開心喇 ~

又凍咗呀   所以又食雙腸丁米   正呀   不過唔敢再成日食喇   好驚食大咗個胃口呢 ~

菇場有啲嘢做   做下抖下好快就 Lunch Time 喇 ~

又未餓   所以去銀行入票   行到 1 點就買酸辣米線番菇場食呢 ~

放工去街市買餸   如果呢個街市係有冷氣就好   因為真係好多嘢有得買   可惜實在周圍都係濕濕立立又污糟   買完就勁想即走囉 ~

去信箱拎信   估唔到收到老表寄嚟嘅撈生   實在太開心喇   因為我好想食呀   依家比我有種願望成真嘅感覺   哈哈   實在太多謝老表同小寶呢 ~

今晚要滾湯   所以都唔抖喇   即刻預備晚餐   諗住 7 點半有得食   但最後都差唔多 8 點先食得   里奧大人又打嚟話放工   不過我唔等佢喇   我自己食先   唔想太夜食嘛 ~   

是日晚餐 - 酸梅麵豉蒸排骨 + 菜心 + 芫茜皮蛋魚片湯  

酸梅麵豉蒸排骨 - 買酸梅麵豉都要 $5.5   我覺得貴呀   所以今次買 $15 蒸嘅排骨   我驚買 $10  嘅話   酸梅麵豉多過排骨呀   今次里奧大人話好食添呀   佢好小會話我煮肉煮得好食   因為我次次都煮到好鞋   哈哈 ~         

菜心 - $8/斤   今次啲菜心都好靚 ~  

芫茜皮蛋魚片湯 - 太耐無滾湯喇   "北" 湯嘅時候先知道原來無切開隻皮蛋   太論盡喇 ~

洗埋碗都 9 點幾 lu   沖個勁熱水涼   沖完有啲虛脫   可能太熱   哈哈 ~

口痕食脆豬肉乾啦   咁 11 點瞓嘛   點知個胃頂住頂住 ~