咕嚕雞球 + 薑蔥蓉菜心 ( 23-JAN-2014 )

( 23-JAN-2014  THU )

今朝要滾翻熱中藥同肉汁   又要洗幾百樣嘢   真係勁唔想洗   但接受唔到啲嘢用完唔即刻洗囉 ~

為咗了咗件心事   所以早一個站落車去萬寧   因為我要用埋啲過期 Cash Coupon 呀 ~

好感恩經理小姐比我用咋   佢話 $350 都好多   過咗期無得用真係好嘥 ~

買咗 2 支喜療妥同 2 盒 Olay   我再買支 Mousse 都係買咗 $310   所以打比家姐問佢有咩嘢要買 ?!   佢話無   之後唔知講咩   佢笑住話我又唔記得拎 Coupon 啦   我話比唔記得拎 Coupon 仲慘呀   哈哈 ~

最後諗唔到買咩   買多 3 盒出位價嘅 Meltykiss   好在總數係 $369   我驚計錯數一陣唔夠又要再買   好煩呢 ~

買完已經 8 點 40 分喇   要去食早餐啦   咁打比家姐話頭先發生咩事啦   諗住講兩句   點知佢多嘢講到呢   又 9 唔搭 8 咩都講   講咗 10 分鐘   我話唔講喇   要食嘢先喇   哈哈 ~    

菇場無哂大粒   實在太 Free 喇   呵呵 ~

食完 Lunch Box 即刻落去買 Cosmopolitan   因為我想買個毛毛袋呀   感恩買到呢 ~

同事比咗 8 粒笑口棗我食   好耐無食喇   覺得好好味   不過呢啲真係唔可以食咁多   好鬼滯呢 ~

諗住 Hea 到放工   點知無啦啦又多嘢做   好在 4 點幾搞掂哂咋 ~      

放工去超市買嘢   買完就番屋企 lu ~
           
里奧大人又 8 點放工   所以我自己食先   呢幾晚都食印尼撈麵   食到好驚好驚喇   但無計啦   因為差唔多到期嘛 ~

是日晚餐 - 咕嚕雞球 + 薑蔥蓉菜心  

咕嚕雞球 - 我好有心機半煎炸   所以下次想試下整鹽酥雞   啲皮脆卜卜好味呀 ~       

薑蔥蓉菜心 - 買菜搭條蔥   咁唔好嘥嘛   所以加埋蒜蓉薑蓉一齊炒   不過都係淥菜咋   唔想炒菜   唔想咁辛苦   哈哈 ~

沖埋涼就食木瓜   今次喺 Market Place 買嘅馬來西亞木瓜   好似 $27 一個   估唔到又好食喎   起碼有木瓜味   咁我可以多個選擇嘛   因為屋企附近間生果店唔係成日有木瓜買呢 ~

今晚勁喇   10 點 40 分瞓 lu ~