( 31-JAN-2014 年初一 )
大年初一喇 祝個個都身體健康 龍馬精神 財源滾滾來 ~
10 點起身 叫里奧大人去麥當勞買早餐番屋企 Share 食 都懶得落街 ~
本來諗住直接喺屋企樓下 Join 埋媽咪 家姐去婆婆度 不過家姐話媽咪想我地去佢屋企拎利是 一馬當先喎 咁是但啦 去咗媽咪屋企先囉 最搞笑係媽咪唔知我哋嚟 係咁同家姐講話出門口 咁家姐即 Whatsapp 比我 問我喺邊 ?! 其實我都差唔多到啦 之後我叫佢入廁所啦 咁媽咪就唔會催㗎喇 哈哈 ~
我叫里奧大人叫媽咪個名 媽咪以為真係有人搵佢呀 搞笑 ~
派完利是就出發喇 好感恩好快有的士 因為新年係好難有的士呢 ~
今年婆婆唔煮新年飯喇 所以去酒樓食呀 ~
咁我比完錢再比利是個司機叔叔 佢收完之後就即刻去開車尾廂 我無為意㗎 之後家姐同我講話佢一收完利是即開車尾廂 但頭先嚟嘅時候 係家姐自己開㗎咋 哈哈 ~
去肇順飲茶 不過就唔係叫點心囉 因為婆婆話尋晚食過條魚 覺得好好食 所以就嚟呢間 同埋叫個餐喇 ~
年初一食飯 多數只係大舅父 舅母同護士表妹 大食同剪髮表妹 今次大食媽咪都有嚟 因為想見媽咪 所以我覺得好感動呀 ~
婆婆叫個餐係 $2,488 嘅 咁食到個馬拉糕之後 有個侍應同我哋講 話同我哋落單嘅侍應搞錯咗 我哋食緊嘅份量係大份嘅價錢 叫我哋同酒樓 Share 個差額 一人讓一步喎 咁我即問差額幾多啦 佢話 $500 但我話事實係妳哋錯喎 我話等婆婆番嚟先再講 因為婆婆比錢家嘛 不過婆婆話無所謂 咁講真 新年流流都唔想嘈囉 ~
籠仔荷菜蒸蝦 - 好在食咗早餐 因為我唔慣早餐食蝦 哈哈
錦繡乳豬大拚盤 - 因為最尾先轉到嚟 所以家姐第一句就話無咩乳豬嘅 仲想夾比阿妹食添 我聽到之後勁感動
翡翠象蚌帶子
脆皮沙律海皇卷
紅燒花膠雞絲翅
發財好市添大利
清蒸游水海石斑
脆皮一品燒雞 - 我都幾鍾意食脆皮燒雞
臘味糯米飯 - 如果再煙韌啲就更好呢
步步高陞 - 好巨好過癮 同埋都幾好味
原來佢哋剔錯咗 $2,988 不過我哋個個睇都唔知係錯 因為係婆婆一早叫定咗呢
食到差唔多 3 點就走喇 大食表妹一家就去婆婆屋企坐 媽咪同家姐就打的番屋企 我同里奧大人就坐 106 去 Sogo 其實如果唔係里奧大人要買西裝 我都想去婆婆屋企坐囉 ~
好感恩去到 Sogo 買到西裝呀 1 套西裝 + 1 條西褲都係 $2,300 左右 抵呀 仲要係 Last One 如果去婆婆屋企坐就真係可能買唔到㗎喇 因為都不斷有人嚟試西裝 ~
勁想飲咖啡 所以去 McCafe 我想快啲用哂啲 Coupon 呀 仲有 6 張未用 但 5 月就到期囉 我好驚拖下拖下又過期呀 ~
金榛朱古力咖啡 - 好飲呀
鮮奶咖啡
特濃朱古力蛋糕 - 又係好好味
坐 619 番屋企 今晚一定要煎糕食喇 ~
是日懶餐 - 金腿瑤柱蘿蔔糕 + 如意馬蹄糕
金腿瑤柱蘿蔔糕 - 家姐買比我哋食㗎 喺翠園訂嘅 好足料呀 同埋好好味 加埋余均益辣椒醬同甜醬 真係絕配呢 ~
如意馬蹄糕 - 又係好足料呀 大大粒馬蹄 正呀 ~
沖埋涼就睇之前錄嘅電視劇 睇到 12 點幾呀 但唔瞓唔得 因為聽朝要 10 點起身呢 ~
咖啡全家福好靓啊 ~~
回覆刪除大年初一一早咁大籠蝦 我都唔慣啊 嘩哈 恭喜發財
多謝妳欣賞呢 33 ~
刪除嘩哈 連妳都頂唔順一早食咁大盤蝦 估妳唔到呀 哈 ~
初一流流之~ 午安好呀 今朝好寒呀呵..我覺得仲寒過噚日 所以都加多件薄褸..不過我唔like着咁多件衫囉 啲衫太厚個袋成日跌落嚟好煩
回覆刪除今年初一好多食市都冇開呀 連早幾年有開既茶餐廳今年都休到初五先開...早兩年我都係食麥記架 不過今年小俊話想煎年糕做早餐 咁都好...快啲清佐佢唔係又嘥
之媽咁攪笑叫你地去攞利是自己又話出門口既....真係好少初一第一餐咁豐富喎 豐衣足食喇 哈~ 個馬拉糕好大個呀 見到咁大個都覺得好味啲
木 ~ 完全無諗過 2 月凍過 12 月囉 新年果時好熱嘛 仲諗住唔會凍 點知會更加凍呢 ~
刪除我都唔 like 厚衫 特別係出去食嘢時最煩 袋同褸一定要一個位囉 ~
其實我無留意 d 食市幾時開架 因為我年初一同三都係去酒樓 or 屋企食 同埋屋企附近有大家樂大快活老麥呢 d 唔怕無得食 哈哈 ~
媽咪唔知我黎架 所以咪叫家姐快 d 出門口囉 ~
我諗住叫點心食架 估唔到係食餐 真係好豐衣足食呀 哈 ~
馬拉糕堅好味 唔太甜又軟 最緊要係熱辣辣 哈哈 ~