大快活 @ 九龍灣 ( 18-APR-2014 ) + ( 19-APR-2014 ) + ( 20-APR-2014 ) + ( 21-APR-2014 )

( 18-APR-2014  FRI )

發達喇   瞓到 10 點自然醒   梳洗之後就落去食早餐喇 ~

個人好攰   又肚谷谷咁   可能作每月一到呀   所以 Hea 到 1 點先出街   想出街但又唔想出得遠   咁就出旺角啦   因為好多車到旺角   唔駛等   哈哈 ~

行咗始創中心   之後我有啲攰   所以去花園餐廳食 Lunch 喇 ~

羅宋湯 - 顏色好得呀   但其實無咩味囉

肉眼扒 (黑椒汁) 配薯菜 - 最驚食 "乸" 過嘅牛扒   所以唔會再嚟呢間食扒咯

肉眼扒 (黑椒汁) 配意粉

本來諗住行埋聯合同花園街   但我真係有啲唔舒服   所以都係坐小巴番屋企   咁里奧大人話想食龜苓膏   咁陪佢去食啦   我就食糖不甩   勁好味呀 ~

差唔多 8 點先食飯   我勁想食燒鴨呀   不過太興要等位   所以即去大快活   估唔到佢有好多位   可能啲人去哂旅行呀 ~

食完行陣商場就番屋企喇   沖完涼抖陣   11 點都瞓 lu ~       

( 19-APR-2014  SAT )

終於每月一到啦   今次嘔咗 2 次算係好㗎喇   不過個肚都有啲痛   但食咗必理痛嘅經痛丸又 OK 喎   同埋感覺上好似無以前咁痛   但我都係要瞓足一日呢   因為都係瞓下醒下嘛 ~  

里奧大人就做公司嘢   所以唔會驚佢悶   嘻嘻 ~

( 20-APR-2014  SUN )

今朝個肚都有少少痛   但就唔係劇痛   感恩感恩 ~

里奧大人陪我呀   所以無番教會   不過之後佢就幫我拎相機去 Canon 整   整完就約朋友 Tea   實在太好喇   有朋友陪佢   唔駛佢成日喺屋企咁悶 ~

佢差唔多 6 點先番到屋企   所以我叫佢買水餃比我食呀   難得我有胃口嘛   不過我食得一半   叫佢食埋佢 ~

8 點佢去買焗豬扒飯   咁我都有胃口食啲啲 ~

抖陣就沖熱水涼   係勁熱果隻   所以次次沖完涼出嚟都有啲暈   要坐喺梳化回氣先可以吹頭   里奧大人就會話我黐線   成日咁熱沖涼   暈咗就大件事喎 ~   

今晚勁呀   10 點入房瞓添喇 ~

( 21-APR-2014  MON )

瞓到 10 點   諗住一齊落去食早餐   不過個肚都有啲唔舒服   所以叫里奧大人去大快活買早餐番屋企食 ~

感恩有胃口食到一份早餐呀    食完無咁暈   之後就睇電視   抖陣再沖涼 ~

我晏晝都唔餓呀   所以里奧大人自己買麵包同蛋撻番屋企食   最緊要唔好叫我食就得喇 ~

夜晚終於餓喇   我叫里奧大人去叙苑買牛肉飯   不過里奧大人話去唐記買   因為好食啲   咁又係嘅   唐記嘅牛肉飯有埋菜   感覺健康啲   同埋事實又真係好食過叙苑嘅 ~

食完抖陣就沖涼喇   聽日要番工喇   所以我 10 點幾就自己瞓先 lu ~