蕃茄煎紅衫魚 + 瑤柱脆肉瓜 ( 23-APR-2014 )

( 23-APR-2014  WED )

今朝落毛毛雨   所以又涼咗咁噃 ~

食完早餐嘆報紙嘅時候   又見到渠王   不過我今朝好攰   無哂 Mood 想講嘢   所以無叫佢坐喺我隔離   佢坐喺我後面   但我就等埋佢一齊番菇場呢 ~

菇場忙呀   好在可以抖一抖再忙   忙完抖一抖咁囉 ~

好餓呀   所以 Lunch Time 一到就飛去買米線   之後即飛番菇場開餐喇   但其實我次次食完碗米線   之後隔半個鐘就會覺得好脹胃   要飲茶消滯呢 ~

又黎 5 點先有急嘢做   不過做唔哂呀   好在聽朝比同事都 OK   唔係就要開 OT 㗎喇 ~

去街市買餸   因為今日好有煮飯 Mood 呀   頭先一路買餸一路同 PMS 傾咗 40 分鐘電話   所以番到屋企要即刻煮備晚餐呢 ~

是日晚餐 - 蕃茄煎紅衫魚 + 瑤柱脆肉瓜  

蕃茄煎紅衫魚 - 之前睇肥媽嘅 "食平 DD" 整魚餐   所以睇果時已經超勁想食魚啦   尋晚同里奧大人講   睇完肥媽整蕃茄煎紅衫魚   一定要整嚟食   佢見到碟魚就即刻同我講   估唔到妳真係整   咁又她難怪佢唔信嘅   我好少會話想食就即整   不過今次煎得唔夠脆   下次要再努力   同埋呢 2 條細細嘅紅衫魚都要 $30/份   我覺得貴呀   同埋無咩肉食咁喎   所以下次我會買條大條啲   煎都易啲啦   今次買咗 3 個蕃茄同 $2 蔥   真係配料勁過主菜   如果我放哂啲蕃茄落碟   完全係唔見咗條魚添呀   哈哈 ~     

瑤柱脆肉瓜 - 好耐無食脆肉瓜喇   所以見到即買   $5/3 條勁抵呀   今晚煮咗 1 條咋   因為我今晚其實唔太餓   因為食完碗米線滯到依家囉 ~

里奧大人 8 點番到屋企   咁煮個蝦子麵佢食啦   之後我洗埋碗就沖涼 lu ~ 

今晚又睇番 "心計"   好似好耐無睇咁 ~

11 點瞓喇   但其實又唔眼瞓 ~